SAFF U17 C’ship: Bteng jingjop ka India; pynliem da 2 kol ïa ka Bangladesh

Thimpu, Nailar 22: Ka kynhun ki thei-ïalehkai U17 jong ka India ka la wanrah ïa ka jingïalehkai kaba khlaiñ bad kaba kyrpang ban ïoh ïa ka jingjop kaba ar sien lynter ha ka lympung jong ka SAFF U17 Women’s Championship 2025 da kaba pynliem ïa ka Bangladesh da 2-0 ha Changlimithang Stadium ha ka sngi Thohdieng.
Ka thei ïalehkai jong ka jylla Meghalaya ka Bonifilia Shullai, ka la ïoh ban kyntiew ïa la ka jong ka kyrteng ha ka thup thep kol da kaba pynkhih ïa ka kol kaba ar ha ka minit kaba 76, katba ka kol ba nyngkong la thep da ka Pearl Fernandes (14’) kaba la pynlong ïa ka India ban lamkhmat ïa ka kylla step da 1-0 kol.
Baroh arngut ki thei ïalehkai ka jylla ki la mih madan ha kane ka jingïalehkai. Ka Alisha Lyngdoh ka la ïalehkai baroh kawei ka jingïakhun hadien ba ka la shah jied ha ka kynhun ba sdang jong ki 11 ngut (Starting-XI), katba ka Bonifilia ka la mih bujli ha jaka jong ka Pearl Fernandes ha ka minit 62 jong ka kylla miet. Ka long ruh kaba jia ryngkhat ba baroh arngut ki la don bynta ha ka ban thep ïa ka kol kaba ar ha kane ka jingïalehkai.
Kane ka jingjop ka la pynskhem ruh ïa ka kyrdan jong ka India ha khlieh duh jong ka Group. Ki la kamai 6 poiñ da kaba jop arsien na ki ar tylli ki jingïakhun.
Naduh kaba sdang, ki samla ïalehkai ka India ki long kiba peitngor bha. Ki thei ïalehkai ba shadien ki la long kiba skhem kum u mawsiang, da kaba kyntait ïa ka Bangladesh wat tang ban ïoh ïa ka jingpyrshang kaba rit sha kol. Ki shijur ba apdien hapdeng (central defensive) ki la treikam bha, katba ki full-back na baroh arliang ki la pyndep ïa la ka jong ka kamram ban phaidien lada jia ba wan ka jingma. Man ka por ba shah pynpra ïa u lain ki nongapdien, ka Munni kaba ap kol ka don ha ka jaka kaba biang ban kem bad tehlakam ïa ki bol na ka jingma.
Ha ka minit kaba 14, ka centre-back ka Divyani Linda ka la ïoh ban shimti ïa ka bol bad napdeng madan ka la mareh pynstet shakhmat. Katba ki nongïalehkai ba shadien ki dang wan ban khanglad ïa ka, ka la pashat noh ïa ka bol sha ka Pearl Fernandes, bad da ka kjat kadiang ka la khyrwit ïa ka bol sha kol. Watla ka nongap kol ka Bangladesh ka Yearzan Begum ka la ïoh ban pyndei tiak da ka kti, hynrei kam shym la lah ban khanglad ïa ka bol ban rung sha kol.
Ka Bangladesh ka la pyrshang ban jubab, kham bunsien na ki set-piece (korner bad free kick). Ka free kick jong ka Sauravi Akanda Prity ka la poi beit beit ha ki kti jong ka Munni, katba ka jingpyrshang thep da ka khlieh jong ka Mamoni Chakma na ka corner ka la kiar sharud. Ka khyllipmat kaba bha tam jong ki ka la wan ha ka minit kaba 37 lyngba ka Fatema Akter, hynrei ka jingbiang por bad jaka ïeng jong ka Munni ka la pynsuk ban tehlakam ïa ka bol khlem jingbakla.
Ka kylla miet ka la long ha kajuh ka rukom ha kaba ka India ka la tehlakam bun shah ïa ka bol bad ka Bangladesh ka la hap ban pynkhlaiñ shadien. Wat la ki lad ki la nang duna, hynrei ka India kam ju ïakynduh ïa ki jingma.
Ka kynhun ka la jan ïoh thep ïa ka kol kaba ar ha ka minit kaba 72, na ka jingpyrshang jong ka Nira Chanu Longjam, hynrei ha kane ka kynti, ka Begum ka la lah ban khanglad.
Hynrei ka jingpyrshang jong ka India kam shym la sangeh hangne, ha kaba ha ka minit kaba 76, ki arngut ki thei ïalehkai ka jylla Meghlaya ki la don bynta ban pynïoh ïa ka kol kaba ar lyngba ka corner kick. Ka bol pashat kaba thikna jong ka Alisha Lyngdoh ka la shem ïa ka Bonifilia Shullai, kaba la shu pyndei tiak da ka kjat ban pynrung ïa ka bol shapoh kol.
Ka India ka la pynliem ïa ka Nepal ha ka jingïalehkai ba nyngkong ar sngi mynshwa, bad kan aireng pyrshah ïa ka Bhutan ha ka sngi U Blei ha ka por 2:30 baje nohphai sngi.