Shillong, Nailar 17: Ka long ka jingsarong bad ka burom ïa ka Jylla Meghalaya ha kaba ar ngut ki thei ïalehkai phutbol ba kynthup ïa ka samla Alisha Lyngdoh bad ka Bonifilia Shullai ki la shah jied ha ka kynhun India na ka bynta ka SAFF U-17 Women’s Championship 2025, ka ban sa long ha Thimpu, Bhutan naduh 20-31 tarik Nailar.
ïa kane la pynthikna hadien ba u head coach jong ka kynhun phutbol Under-17 jong ki kynthei, u Joakim Alexandersson, u la pynbna ïa ka thup kyrteng jong ki 23-ngut ki dkhot ban mihkhmat ïa ka ri hynne ka sngi U Blei.
Ka Bonifilia kaba dei ka thei ïalehkai pdeng madan, ka la mihkhmat teng ïa ka India ha ka U-16 bad mynta ka la shah kyntiew kyrdan ha ka kynhun U-17. Ha u snem ba la dep ka la mih madan ha baroh saw tylli ki jingïalehkai jong ka India ha ka U-16 SAFF ha kaba ka India ka la wan ba ar.
Katba ka Alisha Lyngdoh ka la shah jied ban don ha ka thup jong ki 8 ngut ki thei ki ban kyrshan ïa ka jingïalehkai ba shadien jong ka kynhun.
Na ka bynta u head coach u Alexandersson, uba la ïalam ïa ka kynhun U20 jong ka India ban ïohrung sha ka AFC U20 Women’s Asian Cup ha ki 20 snem dang shen mynta u bnai, mynta un shimti ïa ka kynhun U17 katba ki pynkhreh ïa ka SAFF championship shuwa ka lympung ïaknieh rung (Qualifiers) sha ka AFC U17 Women’s Asian Cup, ka ban long ha u Risaw ha Kyrgyz Republic.
Ha ka format kaba thymmai ka ban ai ïa ki nongïalehkai ban ïalehkai kham bun por, ka SAFF U17 Women’s Championship kan don saw tylli ki kynhun (India, Bhutan, Nepal, bad Bangladesh) ki ban ïakhun ha ka rukom ïalehkai kaba la tip da ka double round robin league. Kawei pa kawei ka kynhun kan ïalehkai hynriew tylli ki jingïalehkai, bad ka kynhun kaba kamai bun point kan ïoh ïa ka nam lahduh.
Ka kynhun ki thei ïalehkai ka ri kan sdang ïa ka jingïakhun pyrshah ïa ka Nepal (20 tarik Nailar), bud sa ka Bangladesh (22 tarik Nailar), Bhutan (24 bad 27 tarik Nailar), Nepal (29 tarik Nailar), bad khatduh, pyrshah ïa ka Bangladesh sa shi sien (31 tarik Nailar).
Baroh ki jingïalehkai yn pynlong ha Changlimithang Stadium ha Thimphu.
Ka thup kyrteng jong ka kynhun U17 jong ka India ki long:
Goalkeepers: Munni, Surajmuni Kumari, Tamphasana Devi Konjengbam.
Defenders: Alena Devi Sarangthem, Alisha Lyngdoh, Binita Horo, Divyani Linda, Elizabed Lakra, Priya, Ritu Badaik, Taniya Devi Tonambam.
Midfielders: Abhista Basnett, Anita Dungdung, Beena Kumari, Bonifilia Shullai, Julan Nongmaithem, Pritika Barman, Shveta Rani, Thandamoni Baskey.
Forwards: Anushka Kumari, Nira Chanu Longjam, Pearl Fernandes, Valaina Jada Fernandes.
Head coach: Joakim Alexandersson; Assistant coach: Nivetha Ramadoss; Goalkeeper coach: Dipankar Choudhury; Strength & Conditioning coach: Saifulla