Sa tang lada pynbeit pynthymmai ïa ka 6th Scheduled ka Mawlai kan mih 2 tylli ki Constituency: MDC Mawlai

Shillong, Nailar 23: U MDC ka NPP na Mawlai Constituency u Bah Teiborlang Pathaw u la pynpaw ïa ka jingkmen kaba khraw hadien ba ka ïing dorbar kaba kyrpang jong ka KHADC ka la mynjur ïa ka kaiphod jong ka Delimitation Committee kaba ïadei bad ka jingpynthymmai ne phiah ïa ki MDC Constituency bad u la ong ruh ba wat la ka Mawlai ka la don bun ki nongthep vote hynrei kan neh beit kumjuh watba la pynlait noh ïa ka Mawpat, hynrei ka jingpynmih pat ïa ka Mawlai sa kawei ka Constituency kan lah ban long satang lada ka sorkar pdeng kan pynkylla ne pynthymmai ïa ka khyrnit kaba 6 jong ka riti synshar ka ri hangta ïa ka Mawlai yn sa pynmih 2 tylli ki constituency.
U la ong ba kumba la tip ba ki paidbah ka Mawlai ki angnud ba ka Mawlai Constituency kan neh kumjuh hynrei hadien ba la mynjur hapoh ka ïing dorbar ha ka sngi Thohdieng la ïohi ba ka Mawlai ka neh kumjuh lait noh tang ïa ka Mawpat ba ki la pynlait noh bad la pynngat noh sha Mawkhar-Pynthorumkhrah. “Nga ai khublei ïa ka Dorbar Shnong Mawroh ba ka la shimkhia ban ïakren bad ka Select Committee ba ka dei ban pynneh ïa ka Mawlai kumba ka dei ban long hi bad kumta kumba ka long mynta ka Mawlai ka la neh kumjuh bad nga ai khublei ruh ïa ki paidbah ka Mawpat kiba watla ngan ym don bynta shuh bad ki ha ka MDC election ka ban sa wan hynrei ki la jied ïa nga ha baroh kane ka samoi treikam kaba san snem mynta bad nga ngeit skhem ba ha ka constituency kaba thymmai ka Mawkhar-Pynthorumkhrah kin ïoh ka jingshakri kaba khambha na ka bynta jong ki,” ong u MDC ka Mawlai.
U la ong ba ka Mawlai mynta kan long beit kumba la ïaleh ha ka election MLA kaba la dep bad mynta ruh kan long kumjuh wat lada ba ka jingdon ki nongthep vote ka la kot sha ka 53 hajar ngut bad ha kane ka kynti ka lah ban tam khyndiat namar lah nangkiew ki briew kiba ïoh ka lad ban thep vote, hynrei hap ap pat ïa ka jingpynkhreh ïa ka electoral roll kaba yn sa leh da ka sorkar bad yn sa tip nangto ba kin sa don ki ban shah wengnoh ki bym dei ki nongthep vote napoh ka Mawlai hynrei ka jingdon ki nongthep vote kan poi hi sha ka 53 hajar ngut tam eiei.
Ha kaba ïadei pat ba ka jingthmu ka sorkar pdeng lyngba ka tnat Kam Pohïing ban pynthymmai noh ïa ka khyrnit kaba 6 ka riti synshar ka ri u MDC u la ong ba kan don ka jingpynbun ïa ki seat MDC bad na ka liang ka sorkar jylla ka la don ka jingpyrkhat ban phiah noh ïa ka Mawlai ha ki 2 constituency hynrei namarba kam pat wan ka jingpynkylla ïa kane ka khyrnit la kwah ba ka Mawlai kan long beit kawei wat lada ka jingdon ka vote ka long kaba bun bha hynrei ban pynpait ïa ka Mawlai ïa mynta kam pat long.
“Lait satang lada ka wan ka jingpynkylla ïa ka khyrnit kaba 6 lah thikna ba ka Mawlai kan wan artylli ki constituency hynrei ïa mynta ka Mawlai kan neh hi kumjuh bad ka jingmih noh ka Mawpat ka la kham pynduna ïa ka jingdon kiba thep vote kaba mut ba ka lah ban poi sha ka 57 hajar eiei hynrei mynta ka la kham duna,” ong u MDC ka Mawlai.