Sa tang khyndiat ki kam ba dang sah ban pyndep ïa ka jingtei ka Mini Secretariat ha Jowai

Jowai, Naiwieng 21: U ma Sniawbhalang Dhar uba dei u Symbud Myntri Rangbah ka sorkar jylla ha ka sngi Thohdieng u la leit jurip ïa ka Mini Secretariat jong ka ‘West Block’ ha Jowai (PWD), ha kaba ula lap ba kam mynta ka la ïaid bha shakhmat la kumba 90%+ bad kaba sah ka long satang ki kam ban pyndep noh ïa ka (Finishing).
Ha kane ka sngi la wan ban synran lang ïa u Symbud Myntri Rangbah da u ma Wailadmiki Shylla uba dei u Myntri ka Koit ka Khiah bad ka kam sports nalor ki ophisar jong ka tnad PWD bad kiwei.
Ïa katei ka Mini Secretariat jong ka ‘West Block’ la tei ha ka jinglut kaba T. 20 klur, ïa kaba la bei pisa da ka sorkar jylla bad kaba sah ka long sa ka ‘East Block’ bad ka ‘North Block’ ïa kiba yn sa pyntrei hadien ba la dep ïa ka ‘West Block’.
Ka jingpyndep ïa kane ka Mini Secretariat ha Jowai (PWD) kan ïarap shibun eh ban lait na ka jingkhapniah khamtam ha DC ophis ha Ïawmusiang bad shibun ki tnad ophis yn pynkynriah sha kane ka Mini Secretariat bad kane kan pynsuk shibun eh ïa ki paidbah kiba leit donkam. Ula pyntikna ruh ba ïa ka ophis DC kaba don ka Ïawmusiang ym pynkylla noh sha ka ïew heh ne ka Shopping Mall, la ong u ma Sniawbha.
Ha kane ka sngi la leit jurip ïa ka Working Women’s Hostel kaba dei na ka bynta ka Jaiñtia Hills ha ka jinglut kaba T. 27 klur tam ka pisa hajan ka DTO bad ha kane ka taïew ban wan ka kam kan sa sdang noh.