Shillong, ïaïong, 13: Ki lai ngut ki samla Khasi kiba la shah kem ha ki Pulit Assam na ka Shnong Sabuda halor ka jingshah kynnoh ba ki thmu ban wiangding ïa ka jingkieng ha Wah Umler, mynta kin hap ban shu ap khmihlynti sa tang ïa ka jingbishar kaba hok jong ka Kashari na Assam.
Kine ki lai ngut ki samla Khasi ki dang don mynta ha ka kti ki Pulit Assam ki dei kiba la tip kyrteng kum u samla Barson Lawai, u samla Standing Khriam bad u samla Dispar Mukhim. Ïa kine ki lai ngut ki Pulit ka Assam ki la kem na Umpaklong kaba don hajan ka Wah Umler.
U Myntri ka tnat Kam Pohing ka Sorkar Jylla u Bah Lahkmen Rymbui ha ka jingïakren bad ki lad pathai khubor ha ka sngi Palei u la ong, “ïa kine ki lai ngut ki samla Khasi la kem halor ka jingkynnoh ba ki thmu ban thang ïa ka jingkieng. Ban pynshisha ïa kata ngam lah bad ngam lah ban ong la ka dei ne ka lait. Ngi na ka Sorkar ngi la ban ïakren bad u Deputy Commissioner jong ka Ri-Bhoi District hynrei katkum ka jingtip, ïa kine ki lai ngut ki Pulit ki la mudui da ka ejahar bad tian bishar ruh ha Kashari. Watla katta ruh na ka liang jong ngi, ngi la pyrshang ban ïarap hynrei namarba ka kam ka la poi ha Kashari kam dei kaba suk.”
“Na ka Sorkar ngin sa peit kaei kaba ngi lah ban leh khnang ba kine ki briew kin ïoh ïa ka jingbishar kaba hok, kaba khuid ha kano kano ka bynta,” ong u Bah Rymbui.
Ha kaba ïadei bad kane ka jingjia, u MDC jong ka Mawhati Constituency u Bah Charles Marngar u la phah da ka jingthoh sha ka Sorkar Jylla ba kan tuklar halor kane ka jingjia bad ban phah pynkynriah noh ïa ka case na Assam sha Meghalaya bad ha kajuh ka por u la kynnoh ruh ba ka Sorkar kam shym la shimkhia ïa kane ka kam.
“Haoid, u MDC u la ai da ka jingthoh bad nga la ïakren ruh bad u bad nga la pyntip ba ki Pulit ka Assam ki la ujor ejahar bad la rah ban tian bishar ïa ki lai ngut ki samla Khasi sha Kashari. U dei ban sngewthuh ba ka kam jong ka aiñ kumno ka treikam. U la ïakren bad nga ban pynkynriah ïa ka Case na Assam sha Meglaaya, ïa kata ngam lah ban batai namarba ka lynti jongka aiñ ka don,” u la ong.
“Ngi na ka liang jong ka Sorkar kaei kaba ngi pyrshang ka long katba long ba kine ki briew ki dei ban ïoh ïa ka jingbishar kaba hok,” u la bynrap.
