Shillong, Naiwieng 09 : Ka United Democratic Party (UDP) ka la kam ba haduh mynta ka la dep ban ïoh kyrtong ha ki 18-20 tylli ki constituency ha Khasi Hills Autonomous District Council katba ha Jaintia Hills Autonomous District Council (JHADC) ki sah sa tang katto katne tylli ki constituency ban ïoh kyrtong.
Na ka liang u Working President ka United Democratic Party (UDP), Bah Titos W Chyne haba kren bad ki lad pathai khubor u la ïathuh, “Ha rilum Khasi ngi la dep ban ïoh haduh 18-20 ngut ki kyrtong an ki 29 seat hynrei ka jingjied ïa ki 9-10 ngut ki kyrtong kiba dang sah ka kam ka dang ïaid.”
Shuh shuh u ong ba na bynta ka rilum Jaintia pat, bun ki la dep ban ïoh ïa ki kyrtong watla mynta ki dang ap ïa ka kaiphod kaba pura na ka UDP-West Jaintia Hills.
“Ïa ka kaiphod ki lah ban wanrah ha ka central executive committee jongka party kaban long ha shen,” u la ong da kaba bynrap ruh ba ïa ka thup ki kyrtong ki lah ban pynbna noh ha ka general council jong ka party kaban long ha ka 06tarik Nohprah mynta u snem na bynta kitei ki ar tylli ki ADC.
Ha kajuh ka por, u Bah Titos uba dei ruh u nongïalam ka Liang Pyrshah ha ka Iing Dorbar jong ka KHADC, u la ong ruh ba ki kwah ba ka sorkar ka pynlong noh kham kloi ïa ka elekshon MDC hadien ba la kut ka jingpynjlan ïa ka samoi treikam ha ka sien kaba ar.
Shuh shuh haba pynshai halor ka jingong ba ka sorkar pdeng kan wanrah ïa ka jingpynkylla thymmai ïa ka Khyrnit ba Hynriew ha Parliament ha kane ka Dorbar Tlang kaban wan ha u Nohprah, u Bah Titos u la ong, “Hynrei ka samoi treikam jong ngi ka la kut kumta ngi kwah ba ka sorkar kan pynlong noh ïa ka elekshon tang shu kut kane ka jingpynjlan por.”
Da kaba kob ïa ka jingïaid lynti ka party ha kine ki khyndiat snem, une u heh UDP u la ong ruh ba ha u snem 2023 ka party ka la ïoh haduh 12 ngut ki MLA na ki 6 ngut ba ki ïoh ha ka elekshon ba ladep. Kumjuh u ong ruh ba ka UDP kala ïoh ban synshar haduh lai snem tam ïa ka Executive Committee ha KHADC kaba pyni ba kum ka party ka la nang kiew.
