Shillong, Kyllalyngkot 14 : Ki seng ne Kynhun bapher bapher ka North Eastern Hill University (NEHU) ki la leit tynruh bad kyrpad sa ïa u Myntri Rangbah ka Jylla u Conrad K Sangma ba un tuklar halor ka kynrum kynram ha ka rukom pynïaid kam bala mad da ka skulbah NEHU.
“Ngi la ïakynduh ïa u Myntri Rangbah ban pyntip sha u ïa ka jinglong jingman ba mynta ha NEHU. Kum ki kynhun ba don bynta, ngi la pynpaw markhmat ba ka University kam don satia ïa kino kino ki khlieh pynïaid kam.ïa mynta ym don VC, ym don Pro-VC, ym don Registrar, ym don Finance Officer-bad kane kala wanrah ïa shibun ki jingeh ha ka jingpynïaid kam hapoh ka University” ong u President ka North Eastern Hill University Teachers’ Association (NEHUTA) Prof Lakhon Kma.
U Prof Kma ula kyntu ïa u Myntri Rangbah ban pynthikna ïa ka jingthung noh ïa u Khlieh pynïaid kam ha NEHU bad ong “Ngi kyrpad ïa u ba un tuklar bad wanrah ïa ka lynti ban pynbeit khnang ba ka NEHU kan don noh ïa u Khlieh nongpynïaid kam”.
U Myntri Rangbah ula pynpaw ïa ka jingsngewthuh ïa ki jingkhia kane ka kam bad u lah ban shim ïa ki sienjam kiba donkam. Kane ka kynrum kynram kala ktah ïa ka jingsiew tulop ïa kumba 900 ngut ki nongtrei (non-teaching staff) bad ki nongtrei ba shu shim nabar, ki bym pat ïoh satia ïa ka tulop u bnai Nohprah.
“Ka jingtuklar u Myntri Rangbah kan long shisha ka jingïarap ban ïoh ïa ka jingshai la ka Pro-VC F Marak kan trei ne em ïa ka kam kum ka VC” ong u Prof Kma.
Ka NEHUTA ka kwah ban pyntreikam ïa ki kyndon ka NEHU Statutes, ban shah ïa ka Pro-PC ban trei ïa ka kam VC ha ka jingbym don u VC.
“Ngi kwah ba u Myntri Rangbah un pynthikna ba ki kam ki jam hapoh ka University kin ïaid beit ïaid ryntih bad ban don mano mano ki ban pynïaid ïa ki kam” bynrap u Prof Kma.
Haba kylli, une u President ka NEHUTA ula ong “Nga ngeit ba un pyndonkam ïa ka Ophis ban phah ktien sha ka Pro-VC ka Tura Campus ba ka hap ban burom ïa ki kyndon. Ka kyndon ka kren shai ba haba u VC um don, ka Pro-VC ka lah ban trei ïa ka kam jong u. Lada kam leh, ka hap ban pynpaw ïaka da kaba shai lyngba ka jingthoh”.
Haba ïai ban ïa ka jingdawa ban weng noh mardor ïa u Vice Chancellor ba mynta u Prof PS Shukla, u Prof Kma ula ong “Kaei kaba ka Ministry kan leh ïa u Vice Chancellor ka dei kawei pat ka bynta jong ka kam. Ngi kwah ïa u ban shah weng noh. Lano kin leh ïa kane, ngim lah ban pynbor ma ngi”.
