Shillong, Naiwieng 19: Ka tnat ki kam rep ka la ïohpdiang ïa ki jingjop ha kaba ïadei bad ka jingplie lad ïa ka kam shalan kaba nyngkong lyngba ka jingpynïoh ïa ka GI-tagged ïa u Soh Niamtra Khasi (Mandarin) ban khaiï hapoh ka Lulu Mall, Dubai, ha kaba ïa kane ka kam la ïoh ruh ban khaiï da ka Jirang Farmer Producer Company (FPC) kaba ha Ri-Bhoi. Ïa une u soh la lah ban pynkit kumba 1 MT da ka Air India Cargo na Guwahati Customs sha Dubai, kaba la pynlong ruh ban kynjoh ha ka sien kaba nyngkong ïa kane ka kam khaiï da kaba pyndonkam ruh ban kit ïa u soh lyngba ki liengsuiñ.
Kane ka jingïoh ban khaiï ka long ruh kum ka jingplie lad ïa ka ïew jong ki nongrep napoh Meghalaya ha kaba kane kan kyntiew ruh ïa ka ïoh ka kot jong ki.
La ong ba bun sien ki nongrep ki duna bha ban ïoh ka lad ha ki kam khaïi hapoh ki ïew kiba heh, naba bunsien ki kut ban khaïi tang hapoh ka jylla. Shuh shuh ruh na ka daw jong ka jingrem ka bai kit ka la ktah bha ïa ka kam khaïi ïa une u soh Khasi Mandarin bad u sohtrun, la ka long ha la ïing ne sha ki ïew bar ri.
Ban shim khia ïa kane ka jylla ka la shim bun ki lad ki lynti ha kaba ïadei ban kyntiew ïa ka kam thung ïa une u soh da kaba pynheh ïa ki jaka thung soh khnang ba kane ka kam kan nangheh ka ban long ka jingmyntoi ïa ki nongrep.
La ong ba lyngba kane ka jingpyrshang ka la ïarap ban kyntiew ruh ïa ka ïoh ka kot jong ki nongrep. La ong ruh ba ka jingshalan kaba nyngkong ïa une u soh la phah sha Dubai ha ka snem 2022 napoh ka Jirang FPC.
Ïa ka Jirang FPC, la thaw hapoh ka Mission Organic Value Chain Development for the North Eastern Region (MOVCDNER) ha u snem 2017. Haba sdang nyngkong ïa kane ka kam la sdang nyngkong eh da ka jingkyrshan jong ka State Government FPC kaba la ïarap ban kyntiew ïa kane ka kam khaiï kaba long katkum ka juk kaba mynta, lyngba ka jingïarap jong ka sorkar. La ong ba ha u snem 2024 ka FPO ka la treikam pura ban ïoh shalan ïa une u soh.
Kiwei pat ki kynhun kiba khaiï kum ka Rongmil IVCS ha East Garo Hills bad Narwang MPCS kaba ha East Jaiñtia Hills, ki la ïoh lang ïa ka juh ka jingkyrshan na ka bynta ban kyntiew ïa kane ka kam rep soh. Kine ki kam ki la aibor ïa ki nongrep ban lah ban pynheh ïa kane ka kam.
Lyngba ka jingïatreilang bad ka Lulu Group International, Mother Dairy Fruits and Vegetables Pvt Ltd, and the National Cooperative for Organic Limited (NCOL), ka jylla ka la lah ban pynïasoh ïa ki nongrep sha ka ïew jong kiwei ki ri.
La ïathuh ruh ba kine ki kam shalan ki la sdang naduh ka snem 2022 da kaba pyrshang ban shalan kumba 5 MT u Khasi Mandarin bad kumjuh ruh ïa ki sohtrun sha Middle East, ha kaba ïa kane la kyrshan da ka Agricultural and Processed Food Products Export Development Authority (APEDA). La ïathuh ruh ba lyngba kane ka jingshalan kaba nyngkong la lah ban khmih bad ban pynbeit ïa ki kam ha kaba hadien kane la lah ban shalan biang ïa ki soh kumba 20 MT ha u snem 2023.
Ha kane ka snem kane ka jingshalan ka la nang pynsuk shuh shuh ïa ki nongrep lyngba ka jingïarap jong ka sorkar jylla ban pynïasoh bad ka Guwahati Customs bad ka Air India Cargo ban pynduna ïa ka jingpynlut bad ka ban ïarap ruh ïa kane ka kam shalan ba kan kloi.
Ka sorkar jylla ka la shim bun ki lad ki lynti bad ki kam da kaba pynlong ïa ki Pineapple bad Khasi Mandarin Festival ha ki nongbah kiba paw kum ha Delhi bad Bangalore ha kaba kane ka la nang ai lad ïa ki nongrep ban pynïar ïa ka kam shalan soh jong ki.
Da ka jingïarap bad kyrshan na ka jylla bad ka sorkar pdeng, ka Meghalaya mynta ka la plie ka lad ban ïoh kyntiew ïa ka kam rep soh ha ka jylla.
Kine ki jingsdang ki la long ka kam kaba khraw ha kaba ïadei bad ki kam shalan kiban dang hap ban leh hadien habud ban pynthikna ruh ba ki nongrep ka Meghalaya kin ïoh ka jingmyntoi ban shalan ïa ki marrep jong ki ha ki ïew kiba heh bad kumjuh ruh ba kin biang ha ka ïoh ka kot jong ki, ong ka kyrwoh ba la phah da Commissioner and Secretary to the Govt. of Meghalaya Department of Agriculture Farmers Welfare.
