Shillong, Rymphang 17: U Myntri ka Tnad Bording u Bah Metbah Lyngdoh ula pynbna ba ka sorkar ka don ia ka jingthmu ban wad ia ki lad ki lynti da kaba phai khmat ban sdang pynmih bording lyngba ka Thermal Plant da kaba buh thong ba kan pynmih 550 MW ka Thermal Power hapoh ka jylla.
Haba jubab ïa ka jingkylli ha ka ïing Dorbar Thaw Aiñ ka jylla ha ka sngi Ba-ar, u Bah Metbah ula ong, “Ka Tnad ka thmu ban pynmih bun ïa ka bording lyngba ka Thermal Power”.
Ka sorkar ka dang wad ïa ki lad kiba lah ban tei ïa ki Thermal Power Plant lane ban sdang hi nalade ne lyngba ki kynhun shimet kiba pynmih bording ne da ka jingïatreilang ban leh ïa katei ka kam”.
Ka jingthmu ka kynthup ïa ka project ba 250 MW ban pyntrei da ka sorkar ne da kaba ïatreilang bad kiwei (Joint Venture) bad 300 MW lyngba ki kompani shimet kiba pynmih bording, bynrap u Bah Metbah.
