Shillong, Jylliew 19: Wat la u slap u la ther la kham bun sngi ha kane ka jylla khamtam hangne ha nongbah Shillong hynrei ka Dam Umiam ka dang duna um sa kumba 35 phut ei ei ïathuh ki bor pynïaid ka MeECL.
Ki la ïathuh kat haduh mynta ka jingkiew ka um ka dang long tang 3180 phut hynrei namar ba slap baroh shisngi ka lah ban poi sha ka 3186 phut ruh haduh mynmiet bad donkam ba ka um kan kiew haduh 3220 phut kat haduh ban ïoh pyllait ïa ka um. Kumta la ïathuh ba dang donkam bha ïa u lapbah ban pynshlei ïa ka dam.
Lah ban pynkynmaw ha kine ki por ba la dep namar ba la jur palat ka jingtyrkhong ka dam ka la hiar sha palat ka 3165 phut haduh ba la mih lut ki lum , surok rim, ki ïing ba shah btep shapoh um bad ter ter. Mynta kitei ki jaka ki la sdang ban shah btep ha ka um.
