Sa kumba 1000 tylli ki kam pulit ba dang thylli nalor ki 3000 tylli ban pyndap noh : Bah Prestone Tynsong

Shillong, Rymphang 26 : U Symbud Myntri Rangbah ka Jylla Bah Prestone Tynsong ha ka sngi Palei u la pyntip ba nalor ki 3000 tylli ki kam pulit kiba lait kiban sa pyndap noh shen bad sam noh ia ki shithi thungkam, kin dang don pat sa kumba 1000 tylli kiba dang thylli.
U ong ruh ba hadien ba la dep ban thung ia kine, ka don ka jingkyrmen ba kin lah ban pyndap ha kito ki jaka ba dang duna.
“Haduh mynta ba nga kren ki dang don sa kumba 1000 tylli ki kam kiba dang lait ha baroh kawei ka jylla. Ngin pyntikna ba ki kam kiba lait man ka sngi ne man u bnai ngin pyndap ïa ki,” ong u Bah Prestone Tynsong haba jubab ha Ïing Dorbar Thawain ka Jylla.
Shwa kane u Symbud Myntri Rangbah u la ïathuh ruh ba ka tnad pulit ka treikam tang 2823 ngut ha ka jaka jong ki 3,486 ngut bad kumta 650 tylli ki kam kila lait thylli ha kylleng ki tnad bapher bapher.
U la ïathuh ruh ba ha ka jylla baroh kawei tang ha ki police station ka jingdonkam ki pulit ka long 1843 ngut hynrei ki don tang 1431 ngut, nangta u la ïathuh ba ha ki Police Outpost pat ki donkam 503 ngut ki pulit hynrei ki don pat tang 380 ngut. Shuh shuh u la ïathuh ba ha ka tnad Traffic ki donkam 439 ngut ki pulit hynrei ki don pat tang 368 ngut, ha ka tnad CID ki donkam 121 ngut hynrei ki don pat tang 107 ngut. Kumjuh ha ka tnad SB ki donkam 580 ngut ki pulit hynrei ki don pat tang 546 ngut.
Shuh shuh u la ïathuh ruh ba ha Police Reserves pat, kam shym la don ka jingmang la ka jong kumta la shu shim bad pyndonkam ïa ki bor pulit na ka District Executive Force kumba ki donkam. “Kumba long mynta ki don 859 ngut ki pulit kiba don ha kylleng ki Police Reserves jong ki 12 tylli ki distrik,” u la ong.
Haba ïadei pat bad ka jingkylli ba wanrah da u MLA ka UDP na Mawsynram Bah Olan Sing Suin, na ka liang u Bah Prestone u la ïathuh ba ïa kitei ki kam baroh kiba thylli ka sorkar kan sa shimkhia bad pynmih noh ki jingpynbna kiba thymmai na bynta ki kam ba lait.
Katba halor ka jingkylli ba wanrah da u MLA ka VPP na Mawlai Bah Brightstarwell Marbaniang u Bah Prestone u la ong “Lada don kino kino kiba pyndonkam bakla ïa ka bor na ka jingtrei ïa ka kam pulit sha ki kam kiba bym dei ki kam pulit ban trei, ngan sa khmih bniah bad pynthikna ba kum kitei ki jingjia kim dei ban jia”.