Shillong, ïaïong 03: Ka kynhun ki nongïalehkai ka jylla Meghalaya ki la pynkut ïa ka jingïashim bynta ha ka 1st Khelo India Tribal Games in Chhattisgarh da kaba khur 2 tylli ki takma ksiar bad 7 tylli ki rnong ban pyndep ha ka kyrdan ba 13 napdeng 30 tylli ki jylla kiba ïashim bynta ha kane ka lympung.
Ka jylla ka la pynkut da kaba khur sa kawei ka takma rnong ha ka sngi ba khatduh ha ka jingïakop siat khnam (archery).
Kane ka takma rnong kadei kaba la khur da ka kynhun siat khnam Recurve men ba kynthup ïa u Hypormi Wanniang, Amebalaker Wanniang bad u Manchiefford Wanniang kiba la pynliem ïa ki nongïakhun pyrshah ka Telangana da 6-2.
Ban shu pynkynmaw ka Meghalaya ka la jop ïa ar tylli ki takma ksiar lyngba ka kynhun siat khnam Compound jong ka Kate Diamond Lyngdoh, Nakibansharai Khonghat bad ka Stracy M Sangma (kynthei) bad ka kynhun u Phrangkupar Kharjahrin, Banwanbor Marwein bad Donkupar L Shadap (shynrang).
