Sa kawei ka jyrsieh tnad Pulit, 10 hajar bai Sticker kamai khlem Permit

Shillong, Nailur 15: Imat ki kam jyrsieh ha ka tnad Pulit kim kut shuh, namar katkum ka jingïathuh u Bah Disparsing Rani, u nongwad RTI ba tbit, la kynnoh ba ki don ki kali kiba khlem ïoh permit ne khlem ki kot ki sla kiba biang ki ïoh tang ka sticker ki kamai ha East Khasi Hills District.
U Bah Disparsing Rani, haba ïakren bad ki nongthoh khubor, u la ïathuh ba ka la don ka jingkynnoh na kiba bun ki Taxi kamai ba don ki taxi kiba shu thied ïa ka Sticker ha ka dor 10 hajar tyngka kawei bad shu airong iong bad rong stem ïa ki kali bad kamai khlem don ki kot ki sla kiba biang. Shipor, hadien ka jingujor na ka liang ka East Khasi Hills Taxi Owners and Drivers Association, ïa ka jingai sticker la pynduh noh, hynrei mynta ka la sdang biang.
Na ka liang jong u, hadien ba la ïoh ïa ka jingujor, u la wan jingtip lyngba ka RTI na ka tnad Pulit bad ka jubab ka long ba kam shym don kano kano ka jingdie ïa ki Sticker.
Pynban na ka liang u Bah Rani u la ïathuh ba don bun ki jingujor kiba kum kine ba ki taxi ki ïoh Stocker na ka tnad Pulit.
Hadien kane ka jingujor jong u, u Bah Rani, la ïathuh ba ka tnad Pulit ka la hukum ïa ka tnad Traffic ban talasi bha ïa ki taxi ba kamai ha Shillong bad ha kane ka jingtalasi la lap lai tylli ki taxi kiba kamai tuh da ki Sticker thok. “Kane ka jinglap ki Pulit ïa ki Sticker thok, ka pyni ba ka don ka jingdie duh ïa ki Sticker”, la ong u nongwad RTI.
Sa kawei pat ka jingtip ba u Bah Disparsing u la ïoh lyngba ka RTI, ka long ba ki don ki ophisar kiba ju talasi ïa ki kot ki sla jong ki kali paidbah bad shaiñ kuna haba ym biang ki kot ki sla, hynrei ki kot ki sla jong ki kali ba la pyndonkam da kine ki ophisar pat kidei ki bym biang ki kot kali. Hadien ka jingujor jong u, ki don ki kali kiba la shah shaiñ kuna bad ki don ruh kiba la hap ban pynbiang noh ïa ki kot. Ïa kine ki kali u Bah Rani u da ruh bad ki Registration Number ne ki Number Plate.
Ha kajuh ka por u Bah Rani, u la pynpaw ruh ka jingsngewkhia ïa ka jingleh bym suidñiew ki nongtrei jong ka ophis DGP, namar haba u la leit ai ïa ka aplikeshon ban pan RTI na ka liang ki nongtrei kim shym la pdiang bad ong ruh ba kiba halor kim shah ïa ki ban shim kino kino ki aplikeshon RTI. Hynrei ki kyndon ka aiñ RTI 2005, kren shai ba lad ban shim ïa ki aplikeshon wat ha Reception ruh bad phah ne ai ha u Public Information Officer (PIO). Na ka liang u Bah Rani u la ujor ïa kane ka jingleh ka ophis DGP sha u Chief Information Commissioner jong ka jylla.