Sa katno ngut ki paidbah kin dang mad ïa ki jingjia ba sngewsih ha Nongpoh Civil Hospital

Nongpoh, Nailur, 24: Ka Synjuk ki Rangbah Shnong Ri-Bhoi District mynta ka sngi ka la leit ban ïakynduh syndon ïa u Abhilash Baranwal Deputy Commissioner ka Ri-Bhoi District halor ka jingud jong ki paidbah kiba leit ban phah sumar ha Nongpoh Civil Hospital khamtam ki jingjia kiba la jia dang shen, ha kaba kawei ka longkmie ka la kha khun ha paiñkhana haduh ba I khun I la khlad noh syndon na kane ka sla pyrthei.
Haba kren sha ki lad pathai khubor na ka liang u Bah PB Sylliang General Secretary ka Synjuk ki Rangbah shnong ha ka jingdonlang u Bah BB Makdoh bad kiwei ki paralok Rangbah Shnong u la ong ba kum ka Synjuk ka la leit ban ai syndon da ka jingthoh sha u DC ka Ri-Bhoi ha kaba ïadei bad ka jingjia ba kawei ka longkmie ka la kha khun ha paiñkhana ba kum ka bor district ka dei ban shimkhia ïa katei ka kam namar kum dang shen ka la don ruh kawei ka jingjia kaba kawei ka samla ka la phlei snam na ka jinglait u pipe drip ba la kynnoh ruh ba ki nongsumar kim shym la patiaw wat hadien ba la khot bunsien bad shibun ki jingjia ha ki por ba la dep.
U la ong ruh ba kum ka Synjuk kam kwah ba ki jingjia ba sngewsih kin dang jia nangne shakhmat bad ki paidbah kin syier ban leit phah sumar ha katei ka Hospital hynrei kum ka bor district bad ka tnad ka koit ka khiah ka dei ban shimkhia ïa katei ka kam bad na ka liang u DC u la ai ka jingkular ba kum kitei ki jingjia kim dei ban dang jia nangne shakhmat.
Shuh shuh na ka liang ka Synjuk ka la ioh ruh ban ïakren bad u DC halor ka jingpynslem ïaka Result DSC kaba ki samla pule ki la dep ban thoh eksam mynta la katto katne snem bad kyntu ruh ban pynmih noh ïaka result DSC ha ka por kaba biang bad na ka liang u DC ka Ri-Bhoi u la kular ban shimkhia ïa katei ka kam ba ka Synjuk ka la pynsngew ha katei ka sngi.