Sa katno ki mynsiem kin dang duh, mih ki 42 shnong ban pynrem ïaka jingshah pyniap ka heprit

Nongpoh, Risaw 13: Da ki hajar ngut ki paidbah naki 42 tylli ki shnong jong ka thaiñ Mawlasnai hapoh ka lama ka Joint Action Committee, Synjuk ki nongsynshar shnong Mawlasnai Area, mynta ka sngi kila mih paidbah ban pynrem jur ïaka jingkharoi ki kam sniew ha kane ka juk mynta, ha kaba tang ha kine ki khyndiat bnai bala dep 3 ngut ka mynsiem jong ki heprit kila shah dkhat jubor, bad khamtam ka jingshah batbor bad shah pyniap dusmon ka heprit na Ri-Bhoi District, kaba la pynsyier ïaki shnong ki thaw khamtam ki kmie ki kpa kiba don khun rit.
Ïa katei ka rally paidbah ba la pynlong mynta ka sngi la lam khmat da u Chairman ka JAC u Bah Nicholas Malai bad u bah Aibok Sarim Secretary lem bad ki dkhot jong ka JAC hakaba la wan ban ïa synran lang da ki seng bhalang bapher bapher naduh ka Khasi Student Union (KSU), Ri-Bhoi Youth Federation (RBYF), Hynniewtrep Youth Council (HYC) Ka HANM, ki paidbah nongshong shnong naduh ki samla bad ki longkmie longkpa, ki khynnah skul.
Ha katei ka jingïaid paidbah, la mih ruh ka sur pynrem halor ka jingroi ki kam sniew ha kane ka juk mynta namar ka jingtyngkai palat ïa u dieng sympat kaba la pynlong ruh ïaki khun ki kti ban im iohmon ryngkat ki kam sniew, ha kaba kum ki paidbah ha katei ka sngi kila pynpaw ruh ka jingsngewlem naka bynta ka iing ka sem jong ka heprit kaba la duh noh ka jingim tang namar ka jinggkwah brai jong u runar u la shim syndon ïaka jingim jong ka hadien ba u la dep ban leh ïaka kam bymman.
Kum ki paidbah kila dawa ruh naki bor ka aiñ ba ki dei ban leh da kaba tyngeh ban pynioh ïaka hok jong katei ka heprit bad ruh ban ai da ka jingpynsajia kaba tyngeh ïa u tei u runar ba donkti ha katei ka kam da kaba phasi ne set along shi junom, khnang ba kum kine ki kam kin nym jia shuh nangne shakhmat.
Hadien katei ka jingialang, ki paidbah ki la pynlong ïaka jingthang mombati kum ka jingsngewlem naka bynta I heprit haka ryngkat ki jingduwai ba in ioh ka jingjah thait haka kti jong u Blei bad naka liang ki paidbah ki la lum synei ruh katba lah da ka pisa ban noh sha katei ka longiing kaba la mad kum katei ka jingjia ba sngewsih.
Kiba bun naki nongkren ha katei ka sngi kila pynpaw ba kum kine ki jingjia ki dei ki bym lah ban pdiang haka imlang ka sahlang bad katno ka long ka jingkthang mynsiem ïa kito ki longiing kiba mad kum katei ka jingjia, bad pynpaw ïaka jingsngew lem naka bynta ka iing ka sem jong ka heprit ba ki la duh noh ïa la ka khun jong ki tang namar ka jingdon ki riew thrang snam.
Ryngkat ka jingbitar pyrshah ïa ka jingleh jong utei u riew thrang snam uba la nud ban shim noh ïaka mynsiem kaba lui lui jong ka heprit ki paidbah ki la dawa ruh ba ka aiñ ka dei ban leh tyngngeh pyrshah ïa utei u briew bad ban pyntikna ba utei u runar uba la leh ïa kitei ka kam bymman u dei ban ioh ïaka jing pynsaja kaba tyngeh ban phasi syndon ne set along shi junom.