Shillong, Risaw, 22: Ka skulbah NEHU ha ka sngi Baar ka la ïasoi ïa ka Memorandum of Understanding (MOU) bad ki hynñiew tylli ki kynhun bapher bapher ha ka jingïalang kaba la long ha Golden Jubilee Auditorium, NEICOD building, NEHU.
U Registrar jong ka NEHU u Colonel (retired) Omkar Singh u la ïasoi ïa ki MOU ha ka kyrteng jong ka NEHU bad ki nongmihkmat jong ki hynñiew tylli ki kynhun.
Haba kren ha kane ka sngi, u Vice Chancellor ka NEHU Prof. Prabha Shankar Shukla u la ong ba ka skulbah ka la jam sha uwei pat u mawmer ban wanrah ïa ki jingmyntoi jong ki samla pule hapoh kane ka skulbah da kaba ïasoi ïa kine ki soskular ïasngewthuh jingmut.
U Prof Shukla u la kular ba ka skulbah ka la buh thong ban pyntyllun shakhmat ha ka rukom kaba dei lyngba kine ki jingïatreilang bad ki kynhun bapher bapher napoh ka jylla, nabar ka jylla bad nabar na ka ri India.
“Ryngkat lang ngin sa tei ïa ki jingkieng ki ban pynmyntoi hi ïa ki samla pule, ïa ka imlang ka sahlang bad ïa ka shlem pule jong ngi,” la ong u Vice Chancellor.
Ka skulbah NEHU ka la ïasoi nyngkong eh ïa ka MoU bad ka Indo-Korea Business Cultural Centre (IKBCC) ban pynsdang ha ka jingpule ïa ka ktien Korea ha NEHU, da kaba ailad ïa ki samla pule ba tip shaphang kane ka ktien ba thymmai bad ïa ka kolshor.
Ka NEHU bad ka IKBCC ki kyrmen ba lyngba ka jingïasam jingtip, kane ka jingïatreilang kan nang pynkhlain shuh shuh ïa ka jingïadei hapdeng ka ri India bad ka ri South Korea da kaba plie lad ïa ki samla pule ban tip shaphang ka kolshor jong ki jaidbynriew ka dewbah Asia mihngi.
Ka NEHU ka la ïasoi ïa ka MoU kaba ar bad ka JETS 24×7, Shillong kaba dei ka Aggregator ba nyngkong eh ha ka jylla Meghalaya ban pynïaid ïa ki thuk thuk ar shaka hapoh ka Jylla. Da kane ka jingïatreilang, la thmu ban pyntreikam da ki E-Scooter bad ki E-Rickshaw hapoh ki sawdong sawkun jong ka skulbah NEHU ban pynsuk ïa ki nongtrei bad ïa ki samla pule kiba donkam kyrkieh ha ka leit ka wan.
Ka skulbah ka la ïasoi sa ïa ka MoU kaba lai bad ka State Cancer Institute, Gauhati Medical College na ka bynta ban leh ïa ka Joint Research ha ka Cancer Biology, ka jingïasam jingtip, ka jingai jinghikai pyntbit ruh ïa ki samla pule bad ïa ki nonghikai.
Ka Mou kaba lai la ïasoi bad ka ICAR – Agricultural Technology Application Research Institute, Guwahati ban peit beit thik tang ha kaba ïadei bad ka jingwad bniah bad ka jingïasam ïa ki jingtip katkum ki tiar jong ka juk teknoloji. Lyngba kane ka jingïatreilang, yn wad ïa ki lad ki lynti kumno ban ïarap ïa ki nongrep ha ka rep ka riang, ka jingkyntiew ïa ki nongkyndong, ka jingpynkha ïa ki lad sengkam ban pynmyntoi ïa ka thaiñ bad ïa ka ri.
Ka NEHU ka la ïasoi ïa ka MoU bad ka CSRBOX Foundation (SMEC Trust) wad ïa ka sap ka phong jong ki samla pule ha ki jait sap bapher bapher. Lyngba kane, ki samla pule kin ïohlad ban tip shaphang ki kam ba ïadei bad ki karkhana, ka jingtip shaphang ka IBM-certified Program, ki lad ïohkam bad kiwei kiwei.
Ka skulbah ka la ïasoi ïa ka MoU ruh bad ka Black Screen Studio Inc., Mumbai ban pynïar ïa ki thapniang ha ka kam shna phlim bad ki jingpynbyrngia. Lyngba kane ka jingïatreilang, ki samla pule kin ïohlad ban tip kumno ban ngam jylliew ha ka kam shna phlim bad kiwei kiwei.
Ka NEHU ka la ïasoi ïa ka MoU ba khatduh eh bad ka TeamLease EdTech, Mumbai. Kane kan ïarap ïa ki samla pule ban bteng ïa ka jingkieng hapdeng ki saw kynroh jong ki kamra klas bad ki kam ki jam lyngba ki sap ki phong, ka digital education bad ka jingpynjanai ruh shuh ïa ki lad ïohkam.
