Jowai, Lber 08: Shi bynta na ka jingrakhe ïa ka ‘International Women’s Day’, ka ophis District Hub for Empowerment of Women, Social Welfare Department, West Jaiñtia Hills District lem bad ka tnad Pulit hadien ka jinglehkmen hynnin ka sngi Thohdieng, kila pynlong sa ka Bike Rally mynta ka sngi saitjaiñ ban pynnsgewthuh paidbah shuh shuh shaphang kane ka sngi kyrpang jong ki kynthei.
Ïa kane ka Bike Rally la kaweh lama da ka kong C. Lyngdoh, Additional Superintendent of Police, Jowai kaba la sdang na District Library Compound, Mynthong, Jowai bad ïaid kylleng ka sor Jowai da kaba pynkut ha Madan Wahriong, Mihmyntdu. Baroh kiba la wan ïashim bynta ki don haduh 70 tylli ki Bikes bad ki Scooty kynthup ïa ki shynrang bad ki kynthei ha ryngkat ki sur jingrwai tyngrai “Kynthei Tur Shaphrang”.
Hashwa ban kaweh lama ka kong C. Lyngdoh kala pynsngew khyndiat shaphang ka International Women’s Day, ïa kaba la rakhe ban ai mynsiem ïa ki kynthei ha kylleng ka pyrthei. Kala ong ruh ka jingithuh ïa ki kynthei ha kino kino ki kam ka long kaba donkam eh ha ka jingshakri.
Shuh shuh kala batai shaphang ka hok jong ki kynthei bad shaphang ka jinglong kyrpang ka kynthei ha ka ïing ka sem bad ha ka imlang ka sahlang. Kala ong ka jingwan ïashim bynta lang jong ki kynthei ha kane ka rally ka pyni ba ki kynthei ruh ki lah ban ñiah wat ïa ki bikes bad ki scooty.
Kiwei de kiba ai jingkren ki kynthup ïa ka kong S. Lakaing BBBP Ambassador, District Hub for empowerment of Women, ma S Shadap, O.C Jowai Police Station, kong R. Ryngkhlem, President Iasnohktilang V.O Mihmyntdu kiba la pynsngew halor ka jingdonkam ban pynkup bor ïa ki kynthei ha kiba bun ki bynta.
