Shillong, Naitung 15 : Ki nongïalam ba hakhmat eh jong ka Trinamool Congress, Meghalaya ha ka sngi Saitjain ki la hiar sha Mowkaïaw, West Jaintia Hills na ka bynta ban pynskhem bad pynsngewthuh shuh shuh ïa ki mat treikam jong ka party kum ka jingpynkhreh na ka bynta ka elekshon MLA kaban long ha u 2023.
Ha kane ka sngi jan baroh ki nongïalam ba hakhmat kynthup naduh u President ka party Bah Charles Pyngrope, nangta u nongïalam ka Liang Pyrshah Dr. Mukul Sangma, MLA ka TMC, Bah George Lyngdoh nalor kiwei kiwei ki nongïalam kynthup ruh ïa ki MDC na rilum Garo.
Ha kane ka sngi, u Dr. Mukul u la kynthoh tyngeh halor ka rukom treikam jong ka sorkar jylla da kaba ong, “Phi la ïohi hi ïa ki jingïakhih pyrshah da bun ki nongtrei jong ki tnad bapher bapher halor ban pynsngew ïa ki jingud jingnam ha ka sorkar. Ngi don ruh bun ki nongtrei kiba jar jar ki mad ïa katei kajuh ka jingeh.”
Shuh shuh u la ong ruh ba ki don ki kam kiba la shu shong thylli kumta na ka daw ka jingdon kiba la shongthait noh lane ka jingkhlad khlem pat dei por jong ki nongtrei.
“Kine kim dei satia ki kam kiba da donkam thymmai ban mang da ka sorkar jylla. Ka sorkar kam don jingmut hi ban pynmih kam pynmih jam na ka bynta ki samla. Kiba bun ki samla jongngi kiba thrang ban long ki nonghikai ki la pyndep ïa ka MTET bad ïa ka result la dep ban pynbna. Ka sorkar ka la kam ba tang shu dep ka interview ïa ki kam yn sa pyndap noh, hynrei kine ki kam ki shong thylli sah. Ka jingbym pyndap shuh ïa ki kam kiba lait ka long thik kumba knieh noh ïa ka hok ki nongwad kam wad jam. Kane baroh kadei namar ka jingbym ler ka polisi treikam jong ka sorkar,” u la bynrap biang.
Haba kynthoh pat halor ka jingpynbeit pud, u D.r Mukul u la ong ba ka jaka nongtymmen jong ki longshwa manshwa la shu ïa pein hapoh ka jingïalam jong kane ka sorkar ba donlang bad ka BJP. U ong ruh ba katei ka rai kadei kaba la shu khlem da don ka jingkitkhlieh.
Na ka liang u President ka Party, Bah Charles Pyngrope pat u la kyntu ïa ki paidbah ka Mowkaïaw ba kin ïasoh bad ka party ban long ki nongpynkylla ïa ka Mowkaïaw.
Hadien kane, kitei ki nongïalam ka TMC ki la leit ruh ban plie ïa ka ophis treikam jong ka party ha Laskein.
