Shillong, Nohprah, 09: Ka Sorkar Jylla ka la pynjlan ïa ka por sa 45 sngi ïa ki Regional Committee ba kin aiti ïa ki kaiphod
Ïa kane la pyntip da u Chief Secretary ka Jylla u Bah D.P Wahlang ha ka sngi Thohdieng.
Ïa ki lai tylli ki regional committee la thaw ha ka 26 tarik Nailur, ban bishar ïa ka jinglong jingman jong ki hynriew tylli ki jaka ba don ka jingïakajia pud hapdeng ka jylla Meghalaya bad Assam bad ban phah ïa ka kaiphod hapoh 45 sngi.
Ki hynriew tylli ki jaka ba dang don ha ka jingïakajia pud ki long ka Langpih ha West Khasi Hills District, ka Borduar, Nongwah-Mawtamur, Deshdoomreah, Block-II ha Ri Bhoi district bad ka Block-I, Psiar-Khanduli ha West Jaiñtia Hills district.
Ïa ka Regional Committee na ka bynta Ri Bhoi District kaba don hynriew ngut ki dkhot la khlieh da u Symbud Myntri Rangbah ka Jylla u Bah Prestone Tynsong, ïa ka Regional Committee na ka bynta ka West Khasi Hills District la khlieh da u Myntri ka Sorkar Jylla u Bah Renikton Tongkhar bad ïa ka Regional Committee na ka bynta ka West Jaiñtia Hills District la khlieh da u Myntri Sorkar u Bah Sniawbhalang Dhar.
Katkum ka jingpynbna ba la pynmih ha ka 26 tarik, Nailur, ka la ong, “ki komiti ki dei ban phah ïa ka kaiphod sha ka Sorkar Meghalaya hapoh 45 sngi naduh ka sngi ba la pynmih ïa kane ka jingpynbna ban pynshong nongrim na ki jingleit sorjamin ïa ki shnong bad ba la pynshong nongrim ba la mynjur lang halor ka histori, ka jingdon jong ki jaidbynriew ba shong shnong, ka jingsngew hun ki paidbah ban ïoh ïa ka jingshakri ka Sorkar bad ka mon jong ki paidbah ka thañ.”
Ka rai ban thaw ïa ki Regional Committee ka long hadien ba ka Sorkar Meghalaya bad ka Sorkar Assam dang shen ki la pynsdang ïa ka jingïakren pynbeit pud ha ka wat kaba ar ban ïapynbeit sa ïa ki hynriew tylli ki jaka ba dang don hapdeng ka jingïakajia pud.
La bthah ba kin leit sorjamin sha manla kawei pa kawei ka shnong, ban ïasyllok bad ki nongshong shnong bad ki nongmihkhmat jong ki Autonomous District Council bad kiwei kiwei ki kynhun khnang ban sngewthuh ïa ka jingangnud jong ki paidbah kiba sah ha ka thaiñ, ban buh jingthoh ïa ki jingtip bathikna ha kaba ïadei bad ka jingjngai jong ki shnong sha ki Administrative Unit.
