Sa 30 tylli yn pyntreikam ïa ki bos STEM ha Shillong, jur ka jingdawa sha Jowai bad Tura

Shillong, Rymphang, 20: Ka jingdawa ka la nang kiew ban leit shaw bad leit on skul ïa ki khynnah da ki bos sorkar ba la tip kum ki Sustainable Transport and Efficient Mobility Society (STEMS), da ka thong ban pynduna ïa ka jingdheng kali ha nongbah Shillong.
Haba pyntip ïa kane ha ka sngi Palei, u Director jong ka School Education & Literacy u Swapnil Tembe u la ong ba ka kynhun STEMS ka la pyntip ba sa kumba 30 tylli ki Bos kin sa wan poi namarba nang jur ka jingdawa ban ai jingshakri.
“Ha ka jingshisha, ngi la ïoh ruh ka jingdawa na Jowai bad na Tura na ka bynta ka bynta kane kajuh ka jingthmu (ban kit ïa ki khynnah skul),” ong u Tembe haba kren sha ki lad pathai khubor.
Ha u snem baladep, ka Sorkar ka la pyntyllun haduh 30 tylli ki Bos watla ha kaba sdang kam pat da don eh ka jingdawa wat hapdeng ka jingpyrshang jong ka kynhun STEMS.
“Namar kane ka daw, ngi (DSEL) la ïatreilang kum kawei ka kynhun bad ngi la ïatreilang ruh ban pynmih ïa ka video (ban pynshai paidbah),” la ong u Tembe bad bynrap ba kum kine ki lad ki lynti ba la ai da ki bos STEM yn ym pat ïohi satia ha kano kano ka bynta jong ka ri.
“Shisien, ba ki khynnah ki la hiar na kali ki la don ki nongsynran, ki ban don naduh ka por ba la hiar bad kin ïalam sha skul, kata ka dei ka rukom treikam bad ngam pat ïohi ha kano kano ka bynta jong ka ri ba kin leh ïa kane,” u la ong.
U la bynrap, “ba ka don ruh ka App ha kaba ki kmie ki kpa kin ïoh jingtip (notification) haba ki khun ki la kiew ha ka Bos ban leit sha skul bad ha ka por ba ki la hiar na ka Bos ban leit phai sha iing. Baroh ki lad jingïada ki la don lypa. Mynta ki bos ba la don lypa ki la khapngiah.”
U Director ka SEL ula pyntip ba ha une u snem, kin don sa kumba 60 ki Bos STEMS ki ban ai jingshakri ïa ki khynnah. “Kane ka mut ba yn pynduna 1800 tylli ki kali ha surok,” ula ong.
“Hynrei, ki jingtynjuh kin don beit namarba ki surok ki long kiba khim bad kine ki Bos kin ym lah ban rung shaduh bakut. Kum ka nuks, ka Shillong Public School kaba don shadien ka DHS point, ka surok ka long kaba khim bad ngi lah ban pyrkhat noh da kaba phah da ki bos ba kham rit ba kin rung haduh phyllaw skul namarba ka jaka pynieng ïa kine ki Bos ruh ka dei kawei ka jingtynjuh. Ngi dang wad ïa ki lad ki lynti,” u la bynrap.
Shuh shuh u Director u la kyrpad ïa ki kmie ki kpa ba kin pdiang ïa kane ka sienjam jong ka sorkar ban phah sha skul ïa la ki jong ki khun da kine ki Bos ba la pynbiang da ka Sorkar khnang ba kan ïarap ban weng ïa ka jingdheng kali ha nongbah.