Sa 3 tylli ki jingïakhun ïa ka India ban ïoh rung sha ka Asian Cup, don jingkyrmen ong u Stimac

Kolkata, Jylliew 01: U Coach jong ka Football Team ka India, u Igor Stimac, u la ong ba u don jingkyrmen ba ka India kan lah ban ïalehkai bha ha ki lai tylli ki jingïalehkai Qualifier ne ka jingïakhun ban ïaknieh ban ïong rung sha ka Asian Cup Championship.
Ka India kan ïakhun ïa ka Cambodia ha ka 8 tarik, Afghanistan 11 tarik bad Hong Kong ha ka 14 tarik mynta u bnai ha nongbah Kolkata. “Lai tylli ki jingïalehkai kam dei kaba suk ban ïalehkai, hynrei ngin hap ban ïakhun tyngeh”, la ong une u Coach na Croatia.
Haba batai ïa ka rukom ïalehkai kine ki lai tylli ki ri ba ka India kan ïakhun, u Stimac, u la ong ba ka Cambodia kadei ka ri kaba ju ïalehkai ban pynkhlaiñ bha ka Defence, ha kaba bunsien ki nongïalehkai ki kham pyllut por shadien. Namarkata ka daw ka India kan hap ban pyndonkam da ki short passing bad wat lada ka team ka don ïa ki nongïalehkai kiba lah ban ïaleh ïa kane ka rukom ïalehkai, kum u Ashique Kuruniyan bad u Udanta Singh, hynrei kin hap pyndonkam da kawei pat ka buit. Ha ki artylli ki Coaching Camp, kata ka Bellary bad ha Kolkata ki la hikai ïa kane ka rukom. Nangta ki lai ngut kiwei pat ki nongïalehkai, kum u Ditto Anirudh Thapa, u Mohammed Yasir bad u Brandon Fernandes, haba ki ïalehkai na ki Club ha ka ISL, ki ïalehkai na kiwei pat ki Position, katba ynda ïalehkai na ka India ki ïaleh na kawei pat ka jaka. Kane ruh ka pynkulmar ïa ki, hynrei shuwa ban poi kitei ki sngi jong ka jingïakhun, hap ban pynbeit ïa kine ki jingkulmar.
U Stimac, u la batai ruh halor ka jingwan ka ISL bad ka jingdon ki nongïalehkai kiba la mih khmat na ka India ha ka Under 17 World Cup ha u snem 2017 ha India, ha kaba ki don na kine ki nongïalehkai mynta ki la rung sha ka Senior Team. “Ka jingïoh jong ki ban ïalehkai ha kane ka Lympung kan long ka jingïarap kaba khraw ïa ka Team”, u la ong.
Nangta u la kdew ruh ïa ka jingïashim bynta jong ki ha ka Qualifier jong ka Asian Under 23, ha kaba ka India kala wan ba ar hadien ka UAE, da kaba ka la jop ïa ka Oman 2-1, ïa ka Krygyz Republic 4-2 bad rem noh pat ha ka UAE da 0-1.
U Stimac u la ong ba um pat lah ban bishar bha ïa ka rukom ïalehkai lane ïa ka jinglah ka team ban ïalehkai, namar naduh u 2019 ba u la shimti kum u Coach, ka India ka la ïalehkai 8 tylli ki jingïalehkai bad baroh 8 tylli kidei kiba la ïakhun shabar ri beit, ym don tang kawei ruh ban ïakhun ha India. Hynrei u la ong ba ha kine ki lai tylli ki jingïalehkai ba ka India kan ïakhun ha Kolkata kan sa paw sha ha kano ka bynta ka India ka don ha ka jingïalehkai Phutbol.
Ka India ka la ïoh jingkyrmen hadien ka jingwan phai biang u Paten jong ka team, u Sunil Chhetri, uba khlem ïalehkai na ka ri ha baroh ki jingïalehkai paralok ba ka India ka la ïakhun ha kine bnai baladep, namar ka jingmynsaw ka kjat.