Shillong, Jymmang 7 : Ka Lenovo, kaba long ka shlem kaba la pawnam ha ka pyrthei kum kawei na kiba tbit tam ha ka global, bad ka Meghshala Trust, kaba long ka seng treimon sngewbha ha ka liang ba ai jinghikai ha ki kam technology, kala nangpynkhlaiñ shuh shuh ia ka jingtreikam jong ka ia kaba la tip kum ka Meghshala program sa na ka bynta palat 100 tylli ki skul ha Meghalaya, bad baroh ki skul mynta ki don haduh palat 200 tylli kiba la ïoh ïa ka jingkyrshan na ka tnad Education, ka sorkar Meghalaya, bad na ka State Education Mission Authority (SSA) bad ka Directorate of School Education and Literacy, Shillong, Meghalaya.
Ban kyntiew ïa ka kam kaba ïadei ba ki jinghikai ïa ki technonlogy bad ban nang pyntbit shuh shuh ïa ki khynnah ha kaba ïadei bad ka jingsngewthuh ïa ka technology, kane ka prokram kan ailad ïa ki ba kin ïoh ban pule ïa ka Science, Technology, Engineering/English, bad Mathematics (STEM) lyngba ka rynsan digital khnang ba ka jingai jingmut jingpyrkhat ha kaba ïadei bad ka STEM kan long kaba khlaiñ. Ka Meghshala kan ïatreilang ha kine ki skul bad ai jingkyrshan ïa ki nonghikai ban pyndonkam ïa ka Lenovo tabs ban ai jinghikai. Kane ka projek ka long kaba la ai jingmyntoi shisha ïa ki nonghikai bad ki khynnah skul, bad la pynkup bor ïa ki ba kin ïoh ban pule kham bun shuh shuh ïa ka STEM.
Palat 55% ki jinghikai ka Meghshala ba pyndonkam ha Meghalaya kidei kiba ha ki class (6, 7, bad 8). Kane ka pyni ba ki nonghikai ki sngewtynnad ban hikai ïa ki jinghikai ha kine ki class namar ba ka prokram ban ai jinghikai ka long kaba bun kiei kiei kiba hap ban leh, ki bun ki video bad ki projek ba lah ban leh ha kamra klass. Da kaba pyndonkam ïa kine ki lad ai jinghikai ha ki kamra klass ki long kiba pynsngewtynnad ïa ki nonghikai bad kumjuh ruh ïa ki khynnah.
25% na ki khynnah skul kiba ïoh jinghikai lyngba ki buit stad treikam jong ka Meghshala ha ki kamra klass ha Meghalaya ki la ïoh 60% bad kumba 20% na ki khynnah ki la ïoh distinction (70% shajrong) ha kaba ïadei bad ka jingstad bad jingsngewthuh, bad ka jinglah ban pyndonkam ïa ki jingshemphang ha kaba jubab ïa ki jingkylli.
Haduh palat 200 tylli ki jinghikai lynnong ba la kren da ka ktien Garo lah ban ïoh na ka Youtube channel “Meghshala Meghalaya” na ka bynta ki paidbah.
La pynlong haduh 18 tylli ki lympung ai jinghikai ha baroh kaiwei ka prokram hapdeng u bnai Naitung 2020 bad Rymphanng 2022. La pynlong ruh haduh 12 tylli ki jingia jinghikai lyngba ka online bad 6 tylli ka jingai jinghikai ha ki jaka ai jinghikai bad 8 tylli ki webinar la pynlong ha ka por ba don ka jingkhang dam ban ai jinghikai ïa ki nonghikai ha kaba ïadei bad ki lynnong ba don bad ka jingbtai da kaba kren ne voiceover bad la pynlong ruh ïa ki jingshim klass lyngba ka online.
Ka jingpyrshang jong ka Lenovo ha ka ban ïasnoh kti lang bad ki kynhun treimon sngewbha ha ki shnong ki thaw bad ban nang ailad shuh shuh ïa ki briew ba kin ïoh lad ban tip shaphang ka technology da kaba ai jingkyrshan ïa ki khynnah skul ha ka jingpule jongki bad ban ai jinghikai ïa ki nonghikai bad ruh ban pynkhlaiñ ïa ka bor jingmut jingpyrkhat ha kaba ïadei bad ka STEM ha ka jabieng jong ki khynnah. Ki buit stad treikam thymmai jong ka Lenovo’s EdTech Classroom bad ka Meghshala Teacher Enablement Program ka ai jingkyrshan na ka bynta ban wanrah ïa kaei kaei kaba biang tam ha ka jingai jinghikai khnang ban kyntiew ïa ki sap ki phong jong ki nongpule. Kane ka jinghikai pyntbit ïa ki nonghikai ka la long shisha kaba ai jingmyntoi na ka bynta ban pynkup bor ïa ki skul ha ka por jong ka jingkhang dam bad ha ka por jong ka jingïaid lynti ban wan sha ka jingkylla jongka digital.
Ha ka snem 2020, ka Meghshala bad Lenovo ki la ïatreilang ban pynmih ïa ka Meghshala- Lenovo ha Meghalaya bad ka jingthmu ka long ban trei bad ki 100 tylli ki skul, kaba wanrah ka jingmyntoi ïa ki palat 200 ngut ki nonghikai bad palat 7000 ngut ki khynnah skul. Kane ka prokram ka la tam ban ïa kaei kaba la angnud bad ka la ai mynsiem shuh shuh ïa ki nonghikai ki bym dei hapoh ka Meghshala ba ma ki ruh ki lah ban ïadon bynta lang bad kane ka prokram, bad kane ka ai jingmyntoi shibun wat ïa kito ki bym ioh bynta mar khmat. “Ngi sngew kmen haduh katta katta ïa ka tnad Pule puthi ka sorkar Meghalaya bad khamtam ïa i Bah V. S. Nongbet, Joint Director School Education and Literacy, Shillong, Meghalaya ha kaba khlem ka jingkyrshan jong I ngin ym lah ban don hangne. Teng khat eh ba ki NGO ki shait ïa kynduh ïa ki kynhun ba ïatehlok kiba biang! Na ka bynta jong ngi, kata kadei ka Lenovo. Ki long kiba la ïaineh bad ngi, ban ïarap ïa ngi ha kaba ïadei bad ka technology bad ruh ha ka hardware khlem ka jingkhnuim. Ngi ai khublei ïa kiei kiei baroh ba phi la leh, ka Lenovo bad ki paralok!” Ong ka Jyoti Thyagarajan Founder& Executive Trustee, Meghshala Trust.
Haba kren shaphang kane ka jingïalang, ka Ms. Pratima Harite, Head of Philanthropy & CSR, Lenovo Asia Pacific ka ong, “Ka buit stad technology kaba biang na ka bynta baroh ki briew kadei ka jingshakri paidbah jong ka Lenovo bad kumjuh ruh ïa ka jingpynïaid ïa ka kam khaïi. Ka jingthrang jong ngi ban pynkupbor ïa ki imlang sahlang kiba dang sahdien da kaba pynïoh ïa ki technology bad jinghikai jong ka STEM la lah ban leh lyngba kane ka jingïatehlok. Ka jingpyrshang jong ngi ban ban wanrah ïa ki jubab lyngba ka EdTech bad plie ïa ki lad ki lynti ïa ki briew ban ïoh lad ban pyndonkam ïa ki ka long kum ka jingaiti jong ngi ïa ka kam kaba ïadei bad ka jingwanrah ïa ki prokram na ka bynta ki nonghikai, ka jinghikai ïa ki da kaba ai lad ba kin ïoh ktah ïa kine ki kor ki bor, bad ka jingpykylla digital ïa ka rukom ai jinghikai bad pynkylla digital ïa ki STEM ha ki ktien lajong bad kane ka ïarap ïa ngi ban ïoh lad ban ai jinghikai kham bun shuh shuh ïa ki khynnah. Ngi ngeit skhem ba kane ka prokram kan ïai bteng ban ai jingkyrshan ïa ki nonghikai skul bad ïarap ïa ki ba kin ïoh lad ban pyndonkam ïa kine ki buit ai jinghikai.”
Khnang ban pynkupbor bad iarap ia ki nonghikai ban nang kyntiew shuh shuh ia ki sap jongki, ka Lenovo ka ai jingkyrshan ia ka Meghshala Trust da ka jingiohi jngai jong ka ha kaba ïadei bad ka jingnang jingtip na ka bynta ban ïoh ïa ka pyrthei kaba bha. Kine baroh ar ka jingpynleit jingmut jong ki ka long ban ai jinghikai ha kaba ïadei bad ki jingtip ne jinghikai jong ka STEM-na ka bynta ki khynnah ha ki kamra klass. Ka Meghshala kadei ka kynhun kaba nyngkong ban ïatehlok bad ka Lenovo ban pyrshang ïa ka jingpyndonkam ïa kane ka buit treikam thymmai ïa kaba la tip kum ka “Tablets for Education” kaba ïahap bad ka jingthmu jong ka jingtreikam ka Lenovo ban pyndonkam ïa ki buit stad khnang ban long ka jingmyntoi na ka bynta ka imlang sahlang. Ha kine ki san snem ba la leit, ka Lenovo ka la ai jingkyrshan ïa ka Meghshala da ka buit stad technology kum ki kor technology ha ki skul kata da kaba ai haduh palat 1500 tylli ki tablet ha ki skul, 25 tylli ki laptop, bad 450 tylli ki smartphone ryngkat bad ka buit treikam ban ïarap ïa ka Meghshala kumno ban tip ha kaba ïadei bad kine ki kor, ki lynnong ai jinghikai, bad ka jingïoh lad ban pyndonkam ïa kine ki tiar ki tar. Kane ka la ïarap ïa ki nonghikai ba kin lah ban ai ïa ki jinghikai ïa ki lynnong jong ka Meghshala bad ka jinghikai ruh kaba long kaba ïashim bynta lang hapdeng ki khynnah. Naduh ba sdang ka jingpyn ïa jngai iwei na iwei bad ka jingkhang dam, ha kaba ïadei bad ka jingïada na ka jingsaphriang ka COVID-19, la pyndonkam bha ïa ka Meghshala App bad kumba long mynta, ka jingpyndonkam ka long palat 28,000 kynta. Ka Meghshala ka thaw ïa ki prokram ha ki kamra klass ban ïarap ïa ki nonghikai bad ki khynnah skul ba kin ïoh ki jinghikai kiba ki la duh. Da ka jingïarap jong ka Lenovo, ka Meghshala ka pynlong ïa ki prokram ai jinghikai lyngba ka online bad offline na ka bynta ki nonghikai ha Meghalaya. Ka Lenovo ka la ai jingïarap ruh ban thoh ïa ki lynnong ha ki ktien shnong ban pynkupbor ïa ki nonghikai ba kin lah ban long ki nonglam khmat ha ki kamra klass khnang ba ka jinghikai kan poi ruh shaduh ki kyndong kynshrot jong ka imlang sahlang ha ki bynta jong ka ri India.
