Shillong, Nailar 17: U President barim ka Federation of Khasi Jaintia Garo People (FKJGP) u Bah Wellbirth Rani bad u Editor ka Kot Khubor U Rupang u Bah Monarch Shabong ha ka sngi Balang ki la pynïasoh sha ka Seng United Democratic Party (UDP).
Haba kren ha ka jingilang u Bah Monarch Shabong u la ïathuh ba wat la u pynïasoh kum u dkhot ka UDP mynta ka sngi hynrei u la don ka jingïadei kaba jan bha bad ka UDP naduh ki snem 90.
“La 50 tylli ki snem ngi shah syndhar beit ha ki seng kiba na shabar bad dei na kane ka daw ba kiba bun ki mat jingdawa kim seisoh la ngi peit ha ka ILP, ka pynbeit pud bad kiwei pat ki mat” ong u bah Monarch.
U bah Monarch ui la ong ruh ba ka la dei ka por ban sei ki nongïalam bad ka sorkar kaba sngewthuh ïa ka jingdonkam ki paidbah bad ïa ka jingangnud jong ki bad na bynta ka jingiohnong ka jylla hi baroh kawei.
“Ngi sakhi ha ka mynnor ba ki don ki bor kiba khang lad ban synshar ki seng riewlum bad ka la dei ka por mynta ba ngin ïa tylli lang kawei khnang ba ki seng riewlum kin ioh ban bat ïa u lakam synshar” u la ong.
U Bah Monarch u la ong ruh ba ka la dei ka por ba ki nongshong shnong ka jylla kim dei ban jied nongïalam shuh tang kiban leit Delhi ban wad skhim hynrei kiban leit sha Delhi da ka thong ban ioh shibun ki jingmyntoiban ban pynurlong ïa ki jingdawa ba la slem.
Haba kren ha kane ka sngi u Bah Wellbirth Rani u la ong ba ka jingwan pynïasoh jong u sha k UDP ka dei namar ka rai kaba baroh ki nongbud bad ki nongkyrshan ki shim rai lang.
U la ïathuh ruh ba ka jingwan pynïasoh ka dei ban pynkhlaiñ ïa ka UDP bad ïa ka mynsiem ieid ri. U la ong ruh ba ka por ka la dawa ba ki seng riewlum kin ioh synshar ha ka jylla namar ki dei ma ki kiba sngewthuh shai ïa ka jingeh jong ka jylla.
Shuh shuh u la ong ruh ba wat la u pynïasoh sha ka UDP hynrei un ym klet satia ban kren ïa ki mat kiba u kren mynba u dang long u nongïalam seng bhalang.
Na ka liang u President ka UDP u la ong ba da ka jingwan pynïasoh kine kan long ka jingmyntoi ïa ka seng bad u la ong ruh ba ka UDP kat nang mih ki sngi kan nang khlaiñ bad u la kop ruh ba kan ïalam ïa ka sorkar hadien ka ilekshon ha u snem 2023.
Ïa kane ka jingïalang pdiang sengwbha ïa kine ki rangbah la wan shim bynta da u President ka UDP u Bah Metbah Lyngdoh,u Vice president u Bah Allantry Dkhar, u Working President Bah Paul Lyngdoh, U General Secretary Bah Jemino Mawthoh, CEM ka KHADC u Bah Titosstarwell Chyne bad kiwei pat ki MLA bad ki nongkit kam ka party.
