Shillong, Jylliew : Ka Mary Mount Higher Secondary School, Mawlai Mawtawar ha ka Lah sngi U Blei ka la rakhe bad lehkmen hadien ba ki khynnah kane ka skul ki la pas shispah na ka shispah (100%) ha ka Secondary Scholl Leaving Certificate (SSLC) bad ha ka Higher Secondary School Leaving Certificate (HSSLC) ka ba dang shu pynbna shen.
Ha katei ka jinglehkmen jong ka skul la pynkup burom ïa ki khynnah kiba pas bad kumjuh ïa ki nonghikai na ka daw ka jingtrei shitom jong ki ba la ïoh kheit ïa ki soh kiba thiang ha ka jingdon lang u MLA ka thaiñ u Bah PT Sawkmie kum u kongsan.
La pyniphuh iphieng ïa ka prokram ha kane ka sngi da ka jingshad bad ki jingrwai na ki khynnah skul bad nonghikai. Ka jingrakhe ka la kham i shongkun shuh shuh da ka jingshad pliang ka principal, ka Kong S Phyllei.
Haba ai jingkren u Bah PT Sawkmie u la pynpaw ba u ïa kmen lang bad ka skul ha kane ka jing pass jong ka skul shispah na ka shispah ha ka Matrik bad klas XII.
“Nga ïohi ïa ka jingsngewrit jong i principal ban kyntiew ïa ka skul bad nga ai khublei ïa ki nonghikai kiba la trei shitom bad pynpass bha ïa ki khynnah,” ong u bah PT Sawkmie bad u la bynrap, “Wat hapdeng ka jingpynthud jong ka khlam ha ki ar snem ba la leit, hynrei ka skul ka la pas shispah na ka shispah.”
U Bah PT Sawkmie u la pynpaw ruh ïa ka jingsngew bynñiaw kaba jur, halor ka jingpynthied mobile ki kmie ki kpa ïa la ki khun na ka bynta ka online class, kaba long kaba donkam, hynrei ki khynnah ki pyndonkam bakla.
“Ka long kaei kaei kaba sngewsih haba ki khynnah ki pheil noh hadien ba ki kmie ki kpa, kiba baieit ïa la ki khun ki pynthied da ki mobile barem dor na ka bynta jong ki, khamtam ha ka por covid ba la sdang ki online klass, hynrei ki khun ha jaka ban khreh kot ki bunkam noh haba peit mobile, haduh ba kim khreh kot bha shuh bad poi shaduh u pud ba ki pheil noh ha ka eksam matrik ne XII,” ong u bah Sawkmie.
U MLA ula ai sngewbha kyrpang sha ki nonghikai jong kane ka skul kum shi bynta ban ithuh ïa ki jingtrei shitom jong ki da ki song pisa.
