Shillong, Nohprah 10 : U Christiano Ronaldo u khlur thep kol bad kapten ka kynhun ïalehkai phutbol jong ka Portugal, hadien ba la kut ka jingïalehkai u la mih noh na madan ha ryngkat ki ummat sngewsih hadien ba ka kynhun ka la mad nam rem da 0-1 kol ha ka Morocco ha ka jingïalehkai quarterfinal ha ka jingïalehkai hynne ka miet sngi Saitjaiñ ha Al Thumama Stadium ha kane ka World Cup 2022 ha Qatar.
Ha kane ka jingïalehkai, u head coach jong ka Portugal u Fernando Santos u la pynneh ka rukom pynmih ïalehkai na ka jingjop da 6-1 kol ïa ka Switzerland ha ka Round of 16 kata da kaba pynshongben ïa u kapten jong ka u Christiano Ronaldo.
Ha katei ka jingïalehkai, naduh kaba sdang ka jingïalehkai ka long kaba mar ïakhaid bha baroh arliang ki kynhun ki la ïoh ban pynsmiej thep kol, hynrei dei ha ka jingïalehkai ba la jan poi artad sha kaba kut jong ka kylla step (42min) ka Morocco ka la ïoh ban lehkmen hadien ba u Youssef En-Nesyri u la thep ïa ka shi kol kaba la pynkmen ïa ka kynhun bad kumjuh ruh ïa ki paid nongkyrshan.
Ka Morocco ka la lah ban kyrda na ka jingshah thep kol ha ka Portugal kaba la ñion naphang sha ka kut ha kaba ka la lah ban lamkhmat da 1-0 kol haduh kaba kut jong ka kylla step. Haba wanphai sha ka jingïalehkai jong ka kylla miet, u head coach ka Portugal u la pynmih madan ïa u Christiano Ronaldo ha kaba ka jingïalehkai ka la sdang ban kylla.
Ka Portugal ka la ñion sha khmat da kaba lah ban bat bad pashat bol bha ïa ki rangïalehkai ka Morocco. U Ronaldo watla u la mih madan ha ka kylla miet, hynrei u la lah ban pynsmiej ïa ka kynhun jong ka Morocco bad ïoh tang shisien ka kabu thep kol hynrei u rangap kol ka Morocco u la ïoh ban kyrda noh.
Ka Morocco ha ka jingïalehkai jong ka minit ba 90+3 ka la hap ban ïalehkai tang 10 ngut hapdeng madan hadien ba u Walid Cheddira u la shah beh na madan hadien ba u la ïoh pdiang ar tylli ki yellow card. Hynrei ka por na bynta ka Portugal ka la lyngkot, kumta haduh kaba kut jong ka jingïalehkai ka khle lah ban pynphai ïa katei ka shi kol bad syndon ka nam rem.
Ka jingïaid lynti jong ka Portugal ha kane ka World Cup 2022 ka la poi noh sha kaba kut tang ha ka jingïalehkai quarterfinal bad lehse ka dei ruh ka jingïalehkai kaba khatduh ïa u Christiano Ronaldo uba la don mynta 37 snem ka rta.
