Ryngkat ki ummat, hakhmat u President UDP wanphai ka para bad pyrsa u Bah HDR

Shillong, Jylliew 29 : Ha u 2018, ka para khatduh u Bah HDR Lyngdoh ryngkat u pyrsa jong u ki la mih ban kyrshan borbah ïa u kyrtong HSPDP, Bah Samlin Malngiang tad haduh ba un da jop suk bad pynliem kdur ïa u hynmen trai jong ki uba dei ruh u nongmihkhmat uba la shu jop lynter khlem rem shuh la da ki phew phew snem kum u MLA ka Sohïong Constituency.
Hynrei kadei ha ka sngi ba u Bah HDR Lyngdoh u rung sha ka UDP ba katei ka para khatduh jong u ryngkat u pyrsa Bah Synsharlang Thabah ba ju khot u Pope, ryngkat ki ummat ki la wan ban pynpaw ba ha kane ka elekshon ban wan kin donlang ryngkat kum ka ïing khnang ba kin ïoh biang ïa ka jingjop.
Da kaba pynpaw ïa ka jingkmen halor ka jingwanphai biang jong ki, u Bah HDR Lyngdoh ha shwa ba un kren u la khot ïa ka para ryngkat u pyrsa ba kin wan shakhmat bad pyni sha ki paidbah ba mynta kum ka longïing ki la long kawei ha ka jingpynkhreh na ka bynta ka elekshon 2023.
“Nangne shakhmat manga bad ka ïing jongnga ngin trei borbah na ka bynta ban shakri ia ki paidbah ka Sohïong Constituency,” ong u Bah HDR ha katei ka sngi.
Nalorkata, u ong ruh ba ka jingjied jong u ïa ka UDP ha ka jaka ka NPP kadei namar u ïohi ba ha ka NPP la shu shongshit tang ki nongïalam katba ki paidbah kim mon satia.
Shwa kane, u President ka UDP Bah Metbah Lyngdoh ba dei ruh u Lamphang ka Ïing Dorbar Thawaiñ ka jylla, u la ïathuh ba ha shwa ba kin pdiang ïa utei u nongmihkhmat ki la wad jingtip ruh ïa ka daw kaba pynlong ïa utei u MLA barim ban mad ïa ka jingshah rem ha ka elekshon 2018.
U ong ruh ba hadien ba ki la tip kumba ki paidbah ka Sohïong Constituency ki la tip lut, mynta pat ki dap da ka jingkmen kaba khraw ban ïohi ba ka ïing ka sem jong u Bah HDR Lyngdoh ki donlang khrui ha kane ka sngi ba u rung sha ka UDP.
“Kumba ong u President ka East Khasi Hills, Bah Titos Chyne, nga ban biang ba ka UDP kam dei satia ka party kaba kwah ban pynïa pait ïa pra ïa ki longïing longsem lane ban pynshit pynshad ne kynshoit ban pynjot ïa ki longïing longsem ,” bynrap biang u Bah Metbah.
U la ong ruh ba mynta kim pat lah ban pynbna lut ïa ka thup kyrteng jong ki MLA kiba thmu ban wan ïasoh sha ka party na bynta ka elekshon MLA kaban long ha u 2023.
Shwa kane, u Working President ka UDP, Bah Paul Lyngdoh ba dei ruh u MDC ka Jaïaw, u la ong mynta ka ïa ka la poi ba kim dei shuh ban ai wai sah ïa ka bor synshar ha ki party kiba na shabar.
“Lada ngim pat lah bad ym pat nang ban synshar hi ai ngin leit phai biang sha Assam ym ban shu leit ai wai ïa u shabi ïing sha Nagpur lane sha Delhi,” u la ong.
U Bah Paul uba dei ruh u MLA bad Myntri barim ka sorkar jylla u la ong ruh ba ka jylla mynta ka donkam ïa ka jingkylla namar hadien 50 snem ba ïoh ïa la ka jong ka jylla haduh 35 snem la shu synshar beit da ki party kiba na shabar jylla kaba thew ba ki trai shnong ki dang ai wai beit ïa ka jingsynshar ha ki party na shabar.
Ha kane ka sngi la ïoh ruh ïa ka jingkren na u Bah Brol Nongsiej MLA bad Myntri ka sorkar jylla, Bah Eugene Lyngdoh, Bah Titos W Chyne MDC ka Sohra bad CEM ka KHADC ba dei ruh u president ka UDP East Khasi Hills, nangta Bah Mitchel Wankhar MDC ka Laban Mawprem, Bah Balajied Ranee MDC ka Nongpoh, nangta u Bah Synsharlang L Thabah pyrsa trai jong u Bah HDR Lyngdoh ha ryngkat ka jingdonlang u General Secretary ka UDP Dr. Jemino Mawthoh, MLA ka Shella, Bah Balajied Synrem, MLA ka Ranikor, Bah Pius Marwein nalor bun kiwei kiwei.