Man la u snem ka jylla Meghalaya ka shongshit bad ka phuh ka phieng bha naduh u bnai Risaw haduh u bnai Kyllalyngkot namar ka dei ka aiom jong ki tamasa bapher bapher kaba khring ïa ki nongwan jngohkai na kylleng ka pyrthei bad na ka ri India hi baroh kawei.
Kane ka dei ka aiom jong ki tamasa bapher bapher naduh ki tamasa jong ki jingleh niam leh rukom, ki tamasa ba pynlong ka sorkar, ki riew shimet ne ki seng bapher bapher. Dei ruh ha kine ki bnai ba ki nongwan shangkai suwari sha India ki tip bha shaphang ka jylla Meghalaya bad ym lah ban len mynta ka jylla ka la don ha ka map jong ka pyrthei ha ka liang ki kam jngohkai namar kat kiba wan sha India kin wad beit ïa ka Meghalaya.
Tang kawei kaba kongsan kaba ngi dei ban kynmaw ba ha ryngkat kine ki jinglehkmen, ka shad ka mastieh, ngi donkam ruh ban ri kyndong ïa ka akor ka burom bad ïa ki riti ki dustur lajong. Namar teng teng dei ha kum kine ki jaka lehkmen ne ki jaka ba pynlong ïa ki tamasa ba ki khun samla jong ngi ki thad burom ïa ka long rynieng jong ki da ka jingia dih buaid bad tanglang teng teng haduh ba la i khlem akor wat tang ban peit ruh. ïa ka jinglong kyrpang jong kano kano ka jaidbynriew la ithuh ha kum kine ki tamasa kumno ki ri kyndong ïa ka akor ka burom bad ïa ki riti bad ki dustur.
Ym lah ban len ka jylla Meghalaya ka dei kawei na ki jylla kaba riewspah bha ha ki riti ki dustur tynrai kat haduh ba u Lat ka jylla ruh u da ïaroh ïa kane ka jingriewspah ka riti ka dustur jongka jylla bad u la banjur ruh ba donkam ban pynneh pynsah ïa kine ki riti bad dustur pateng la pateng. Ngi dei ban ïaroh da shisha ïa ki seng bapher bapher khamtam ka Seng Khasi kaba da shimkhia ban pynneh pynsah ïa kine ki riti ki dustur jongka jaidbynriew. Kawei ba ka seng Khasi ka la leh ka long ban pynneh pynsah nam ïa ki mawbynna da kaba pynïeng haduh sawphew tylli ki Mawbynna ha Lum Sohpet bneng ha ka Sngi U Blei. Ki Mawbynna ki dei ki maw kiba kyrpang bad kyntang ha ka jingngeit jong u Khun Khasi Khara naduh hyndai hynthai. Ym dei ba beiñ ïa kiwei kiwei ki Niam hynrei ka long pat ka jingshisha ba kiba tip shisha ka ki riti dustur tynrai ki dei kiba dang ngeit ha ka Niam Khasi.
Kiba bun kiwei pat kiba ngeit ha kiwei ki niam kim da tip thikna shuh ïa ki riti bad dustur jong ngi ki Khasi. Kumta kaba kongsan ka long ba donkam ban don noh da ki kynja shlem ban ai jinghikai ïa ki khun ki kti jongngi naduh ba ki dang rit ba kin tip shaphang ki riti bad dustur tynrai namar kiba bun mynta wat tang ban riam ïa ka riam tynrai ruh kim nang shuh. Ngim dei ban sngewthuh bakla ruh ba haba ngi shah hikai ban tip ïa ki riti ki dustur tynrai kam mut ba ngin kylla niam. Em la ngi dei ki Niam Khristan, ki Niam Khasi, ki Niam Hindu, ki Niam Muslim bad ter ter ka long kaba donkam ïa ngi khamtam ïa ki khun ki kti jongngi ba kin tip shaphang ki riti ki dustur tynrai khnang ba kan ïai neh pateng la pateng lym kumta kaba sheptieng ka long ba ïoh ki pateng kiba hadien kim tip shuh ïa ka riti ka dustur tynrai ruh.
Kyntang ïawai ngi kyntu ïa ka sorkar ba kan plie ïa ki jaka ai jinghikai shaphang ki riti ki dustur jong ki jaidbynriew bapher bapher kiba dei ki tynrai ha kane ka jylla Meghalaya kata naduh ki Khasi, ki Pnar, ki Garo bad kiwei kiwei khnang ban ym klet ne ban tip ïa la ka jong ka riti ka dustur tynrai lajong. Dei tang lyngba kane ka shlem kaban ïarap ïa ki khun ki kti jongngi ba kin tip da shisha ïa ka tynrai lajong namar ka donkam da shisha ban tip ïa ka tynrai naduh ka riam ka beit, ka rwai ka siaw, ka put ka tem, ki jinglehniam bapher bapher khnang ba haba ngi mih khmat ïa ka jylla sha kino kino ki lympung ngin tip keiñ ban pynpaw nam ïa ka tynrai lajong. Namar kumba long mynta lehse lada leit sha kino kino ki jingïalang baheh lada ym shah hikai lypa shwa ban leit lada ki phah ban riam da ka riam tynrai kiba bun kin ym tip wat tang kumno ban spong ruh.
