Nongpoh, Jymmang 06: Namar ka jingpyrshah jur ïa ka MOU ba la dep soi da u Myntri Rangbah ka jylla bad kumjuh ruh ban pyrshah jur ïa ka Regional Committee ka sorkar Meghalaya halor ki kam pynbeit pud hapdeng ka Meghalaya bad ka Assam, ka Hynniewtrep Youth Council seng kmie ryngkat ki nongïalam ka HIma bad ki padibah ki la thang syndon ïa ka tyngshop u Myntri Rangbah ka jylla bad kumjuh ruh u Symbut Myntri ha ka shnong khappud ha Bakhalapara kum ka jingpyrshah ba kim hun satia ïa kane ka jingïapynbeit pud.
Ka HYC, Sengkmie ryngkat ki nongïalam bad ki dkhot na Ri Bhoi mynta ka sngi ki la hiar sha ka Shnong Bakhalapara ban pynlong ïa ka jingïalang paidbah ha katei ka shnong bad shuwa ba kin ïa kren ne ïa thir halor kine ki kam pud ki kam sam , ki la thang shuwa ïa ka tynshop u Myntri rangbah, u Conrad K. Sangma bad ruh ïa ka tyngshop u Symbut Myntri rangbah, u Prestone Tynsong.
Kane ka jingthang tynshop ka dei ka jingpynrem jur halor ka MOU bad ruh ka jingbym ler ka Regional Committee ban bishar bniah ïa ki jaka ki puta shuwa ban ai kaipod sha ka sorkar ba bun ki jaka ka Meghalaya ka leit noh sha ka Assam ba la pyrshah jur naduh ki Hima, ki Raid bad ki paidbah nongshong shnong ha kitei ki shnong khappud.
Haba leit ban pynlong ïa katei ka jingïalang paidbah ha Bakhlapara la ïalam da u President ba rangbah ka HYC, u Samla Robert Kharjarin bad u President ka HYC Ri Bhoi, u Samla Jason Lennox Nongrum lem bad kiwei ki nongïalam na ka sengkmie bad na ka District bad la don lang ruh u syiem ka Hima Jirang, ki nongmihkhmat na ka Hima Nongspung bad kynthup ruh naduh ki rangbah shnong bad ki paidbah nongshong shnong na kitei ki shnong khappud kiba la shah ktah ha kane ka kam ïa pynbeit pud.
Haba kren ha kane ka sngi kum u nongïalam ba rangbah ka seng HYC, u Samla Robert Kharjarin u la pynrem jur ïa ka sorkar Meghalaya khamtam ïa u Myntri Rangbah ka jylla uba la leit ban soi ïa ka MOU bad u Myntri ka tnad ka kam pohing ka sorkar pdeng ba khlem da khein snep ïa ka hok nongkynti ki paidbah bad ruh khlem da bishar bniah la shu leit lilam ïa ka jaka jong ka Meghalaya sha ka Assam.
U la ong ruh ba ka sorkar Meghalaya ka la khein dew thala ïa ka District Council, ki Hima, ki Riad bad ki trai jaka ha kaba kumno un soi ïa ka MOU haba ïa ka hok longtrai ïa ki jaka ha Meghalaya kam dei ka sorkar bad dei ki paidbah bad kane ka jingleh u myntri rangbah ka la ktah shisha ïa ki paidbah kiba shah ktah ha kitei ki shnong khappud ba ïa ka hok long trai jongki ïa ki jaka la shu leit lilam jubor sha ka Assam.
U la ong ruh ha ka jingshisha shuwa ban soi ïa ka MOU la dei ban da bishar bniah bha ïa ki jaka ki puta rygnkat ka District Council, ki Hima, ki Raid bad ki Shnong, hynrei khlem da tip kipaidbah la shu soi matlah ïa ka MOU bad mynta pat kiba jynjar ki dei ki paidbah ha kitei ki shnoing khappud ha kaba tang na ka daw ka kam pud kam sam ki hap ban shong ban sah hapdeng ka jingsyier mynsiem bad ruh mih ka huri hura para trai jylla ha ki shnong kiba shah ktah ha kane ka kam pynbeit pud pynbeit sam.
