Ryngkat ki nongmihkhmat paidbah, shim bynta shitrem ki paidbah ha ka jingpynkhuid shnong ha Nongpoh

Nongpoh, Naiwieng 26 : Ban wan rah ïa ka khuid ka suba bad pynshlur ïa ki paidbah nongshong shnong ba kin sngewthuh ïa ka jingkordor ka jinglehkhuid leh suba, ka Dorbar Shnong Nongpoh mynta ka sngi ka la pynlong da ka jingpynkhuid shnong paidbah ha baroh ki dong jong ka Shnong Nongpoh.
Ïa kane ka jingpyn khuid shnong la wan ban plie paidbah da u MLA ka Nongpoh, u Bah Mayral Born Syiem kum u kongsan bad u MDC, u Bah Balajied Rani kum u symbut kongsan. La sakhi lang ruh ha kane ka sngi da ka jingdon lang u Rangbah Shnong, u Bah Silverster Mynsong, ka Kong Marian Maring, u Bah Secretary Shnong Nongoh, u Bah Anthony Suchiang bad kynthup kiwei ki Rangbah bad ki paidbah nongshong shnong.
Kum ban pynkynmaw, ka Dorbar Shnong Nongpoh ka ju pynlong ïa ka jingpynkhuid shnong paidbah shisien shisnem man la u snem bad ka thong ka long ban wan rah ïa ka khuid ka suba ha baroh ki bynta bad ki dong jong ka Shnong Nongpoh hi baroh kawei. Haba ai jingkren ha kane ka sngi, u MLA ka Nongpoh, u Bah Mayral Born Syiem, u la ai ka jingïaroh ïa ka Dorbar Shnong Nongpoh kaba la lah ban pynlong ïa kane ka jingpynkhuid shnong paidbah bad kane ka dei kawei na ka bynta ba kongsan tam ban hikai ïa ki paidbah halor ka khuid ka suba.
U la kyntu ruh ïa ki paidbah ba kim dei ba lehkhuid tang haba don kum kine ki jingpynkhuid shnong bad ka jinglehkhuid ka dei ban long man la sngi naduh ing haduh ha bar bad kum ki nongshong shnong ki dei ban don ka jingkitkhlieh ban pynlong ïa la ka shnong kaba khuid ba suba bad khamtam ka Nongpoh kaba dei ka Head Quarter ka District ka dei ban pyni sha kiwei ki shnong halor ka jingdonkam ban lehkhuid leh suba.
Hadien ka jingïalang plie ïa kane ka jingpynkhuid shnong, ki paidbah nongshong shnong ki la shim bynta shitrhem ban pynkhuid ha la ka jong ka dong bad baroh ki la shim bynta ban pynkhuid ïa ki jaka paidbah bad khamtam ka surok paidbah ha kaba mynta ka sngi ka Shnong Nongpoh ka la phong da ka dur jong ka jingkhuid jingsuba kaba ki paidbah ki ïa tylli ban pynkhuid ïa ki jaboh bad ki lynti ki synkien.
Lyngba jong kane ka sngi, u MLA u la sam ruh ïa ka Work Order kaba T. 3 lak bad ki solar system ba la aiti sha ka Shnong Nongpoh ba kang dang pynheh ïa ka Iing Dorbar Shnong bad ruh kitei ki Solar system ban sam sha man la ki dong na ka bynta ka jingshngaiñ ha ka por miet ka por ïong.