Ryngkat ki nongïalam Congress, ïalam u MDC Nongpoh ban leit pynïasoh sha UDP

Nongpoh, Ïaiong 05: U Bah Balajied Ranee MDC ka Nongpoh Constituency ryngkat bad ka kynhun ki nongïalam naka seng Congress mynta ka sngi kila mih noh naka seng Congress ban leit pynïasoh noh bad ka party UDP naka bynta ban pynkhreh ïaka elekshon ban wan ha u snem 2023, kumba kila iohi baka party Congress kam don lyer bad don jaka shuh ban pynim biang bad ba kan lah ban thaw sorkar haka jylla.
Ha katei ka jingleit pynïasoh u Bah Balajied Ranee u ba dei u MDC naka seng Congress sha ka party UDP u la ïalam lang ruh bad ka kynhun naduh ki nongïalam jong ka Youth Congress, ki Mahila, bad ki Parents Body na Nongpoh Constituency kiba la pynïasoh bad ka party UDP naka bynta ban pynkhlaiñ ha kane ka elekshon ban wan, bad naka liang ka party UDP kala pdiang sngewbha ïaki jaka prokram kaba shongkun kaba la long ha madan Umwang ha Ri-Bhoi.
Lah ruh ban ong ba kane ka jingrung UDP u Bah Balajied Ranee bad ki nongïalam kala nang pynkhlaiñ shuh shuh ïaka party UDP ha Nongpoh bad ha Ri-Bhoi District ha kaba naka liang ki nongïalam kila kop ruh ba kin jop bun ki seat naki 5 tylli ki constituency ha Ri-Bhoi District.
La sakhi ruh ha katei ka sngi da ka jingdonlang ki heh nongïalam ka UDP ka jylla naduh u Bah Metbah Lyngdoh ba dei u President, Dr. Jemino Mawthoh General Secretary, Bah Bindo Lanong nongaibuit ba rangbah, ki myntri sorkar jong ka UDP ba kynthup ïa u Bah Lakmen Rymbui Myntri ka kam pohiing ka jylla, Bah Kyrmen Shylla Myntri ka tnad Social Welfare, ki MLA bad MDC bad kiwei kiwei bad ïaka jingïalang ha katei ka sngi la pynïaid da u Bah Donbok Khymdeit President ka UDP Ri-Bhoi District.
Haba kren ha katei ka sngi naka liang u Bah Balajied Ranee u la kren shai bad katei ka jingrai jong u ban rung noh sha ka party UDP kam dei shuh ka rai khyllung khynnah hynrei ka dei ka jingmir jingmut lang bad ki para nongtrei kiba shitrhem jong ka Congress da kaba kren shai ba kane ka jingmih noh jong ki naka seng Congress ka dei ka jingleh jong ki nongïalam bad kum uwei naki nongtrei ba shitrhem u la pynpaw ka jingsngewdiaw da kaba pyni shai kdar ka nuksa halor ka jingmih noh ki MLA jong ka Congress watla ha u snem 2018 ki jop kumba 21 ngut pynban mynta ka seng Congress kam don MLA shuh.
“Kane ka pynpaw ba ka don ka jingduna haka rukom ïalam jong ki nongïalam hapoh ka party Congress bad kane kala jia ruh ha Nongpoh Constituency bad dei na kane ka daw kaba la pynlong ïa nga bad ki nongïalam ban mih noh naka seng Congress watla ngi dei ki nongtrei ba shitrhem jong ka party ban pyniasoh bad ka party UDP kaba don ka jingkyrmen bad kane ka dei ka sngi jong ka jingsah jingkynmaw bad ka jingkmen kaba khraw ba haka ka por ba ki nongïalam jong ka seng Congress ki khlem kynmaw shuh ïangi kum ki nongtrei ba radbah kiba shah ka sngi u slap bad duh thiah duh dem, ka party UDP kala long kaba kloi ban ai jaka rieh tngen bad ka shatri ban kdup” la ong u Bah Balajied.
U la ong ruh ba ryngkat bad ki longkmie longkpa, ki khun samla naki unit bad ki polling booth bapher bapher kiba la leit ban pynïasoh lang ha katei ka sngi kila kular ruh ban ai ka jingïatreilang bad ka party UDP ban nang pynkhlaiñ ïaka jingtreikam ha Nongpoh Constituency bad ka dong Ri-Bhoi bad khlem pep ba ka UDP kan jop bun tylli ki seat ha u 2023 ban ioh thaw sorkar haka jylla bad kane ka jingpynïasoh jong ki nongïalam Congress mynta ka sngi kim pat don wat tang shi pawa ruh, bad phin sa iohi ha ki sngi ban wan shibun ki nongïalam bad ki paidbah kin wan ban ïasoh sha ka UDP ha Nongpoh Constituncy, u la bynrap.
Naka liang ki heh nongïalam ka UDP naduh u Bah Metbah Lyngdoh, Dr. Jemino Mawthoh, Bah Bindo Lanong bad kumjuh ruh ki Myntri sorkar haba kren ha katei ka sngi kila pynpaw ka jingsngewkmen kaba khraw halor ka jingpynïasoh u Bah Balajied Ranee MDC bad ki nongïalam naka prty Congress sha ka UDP bad kane ka pynpaw shai ba ka seng Congress kam don lyer shuh haka jylla bad kane ka dei ruh ka jingkyrmen ba ka party UDP kan khie im biang haka jylla bad khlem pep wat ban thaw sorkar ha u 2023.
“Ngim dei shuh ban dang ai bat ïa u lakam bad ka synshar khaddar haki party ba na kiwei kiwei ki jylla lane u shabi iing, hynrei kane ka dei ka kynti ba ki paidbah ki dei ban sngewthuh shai ba ka party UDP ka dei ka party trai ri kaba mih naka jylla bad kaba don ruh ka jingangnud ban dang wanrah ïaka bha ka miat bad ka jingmyntoi jong ki paradoh parasnam bad ka roi ka par hi baroh kawei” kila ong da kaba bynrap ruh ba ka party UDP ka dei kaba ki paidbah ki phaikhmat ha kane ka kynti bad naka liang kitei ki nongïalam kila kop ruh u snem 2023 un dei u snem ba ka party UDP kan synshar ïaka jylla.