Nongstoiñ, Ïaïong, 07: Ka shnong Langdongdai ka dei ka shnong kaba la don naduh hyndai hynthai bad ka dei ruh ka Headquarter jong ka hima Nonglang Sirdarship bad ka dei ruh kawei na ki shnong kiba ka sorkar pdeng ka la ithuh kyrpang kum ka Aspiration village naduh u snem ba la dep.
Hadien ba ka sorkar pdeng ka la ithuh ïa katei ka shnong, ki heh sorkar na ki tnad treikam bapher bapher napoh ka jylla ki la leit ban ïuhkjat bad ban ïaphylliew jingmut bad ki paitbah nongshong shnong, halor ka jinglong jingman jong ka jaka, ka thung ka tep, ka trei ka ktah, ka pule puthi bad kiwei iwei.
Dang ha kane ka 4 tarik kaba dei ha ka sngi balang lai ngut ki saïantis u Dr Satyavirsingh Principal Saïantis & BI Socïal Science II WBR, DR Rajkumar Principal Saïantis Land & Breeding, Dr Anil Khipal ding lem bad hynriew ngut ki nongtrei jong ka KVK Nongshillong, ki la hiar sha katei ka shnong ha kaba ki la pynlong ïa ka jingïaphylliew jingmut bad ki paitbah nongshong shnong.
Ha katei ka sngi la pynlong ïa ka jingïakynduh lang ha ka hall jong ka Langdongdai Higher Secondary school ha kaba ki nongsynshar shnong ka thaiñ, ki riewrangbah bad ki paitbah nongshong shnong ki la ïapoi. Ha katei ka sngi kitei ki saïantis ki la hap ruh ban ïaid lyngba ka surok kaba khohruh khoram bad kaba ktieh naduh Mawdiang haduh Langdongdai, ha kaba ka la pynlyngngoh haduh katta katta ïa ki ban lap, ba katei ka thaiñ ka dang sahdien ha kaba tang ka surok ruh ym idei satïa ba ki kali ki lah ban ïaid.
Nalor kata ha katei ka sngi hadien ka jingïaphylliew jingmut bad ki paitbah kitei ki saïantis ki la sam ruh haduh shispah jait ki symbai jhur ka sboh, ki dawai na ka bynta ki jingri jingdup kum ki sñiang, ki syiar bad kiwei kiwei. Ka jingleit jong ki ha katei ka shnong ka la long shisha ka jingkyrkhu bad ka jingmyntoi kaba khraw ïa ki paitbah nongshong shnong.
Haba phai ha ka jinglong jong katei ka thaiñ ym lah ban len ba lada ki don ki surok kiba biang ka ïoh ka kot, ka kamai kajih ka kiew sted bha, namar ka dei ka thaiñ kaba seisoh bha bad baroh ki jait jingthung naduh u kwai, tympew, sohtrun, ka kait, ki jhur ba laiphew jait ki mih bha namar ka khydew ka long kaba seisoh bha.
