Ryngkat ki jingbam smai ban ïa khun pyrshah ïa u drok, la rakhe ïa ka sngi pyrshah drok ha Ri Bhoi

Nongpoh, Jylliew 26: Kum kawei na ka thong ban dang bteng ban ïa khun pyrshah na ka jingktah jong u drok ïa ki khun samla ha kane ka juk ba la sdang kynrei u drok ha man la ki jaka ha ka jylla, ka ophis jong ka tnad District Social Welfare Officer, Ri Bhoi mynta ka sngi ka la shim bynta lang ban rakhe kum kata ka sngi pyrshah drok ba la tip ha ka ktien nongwei, ‘International Day against drug abuse and illicit trafficking’ ba la la pynlong ha Distrift Library Auditorium Hall, Nongpoh.
Shuwa ban pynlong ïa kane ka jingrakhe ïa kane ka sngi pyrshah drok la pynlong ruh ïa ka jingmareh marathon kaba 5 km ka jingjngai ba la sdang na Saiden Indoor Stadium bad pynkut ha NSCA Indoor Stadium, Umlyngkdait Nongpoh, kaba dei hi shi bynta ban ïalap sha ki paidbah ba ki dei ban long kiba peitngor na ka jingktah jong u drok,
Haba rakhe ïa kane ka sngi la shim ïa trei lang ruh naduh ka tnad Ministry of Social Justice & Empowerment jong ka sorkar India ryngkat ka ophis u District Sport Officer ka Nongpoh.
U nongmihkhmat paidbah ka Nongpoh Constituency, u Bah Mayral Born Syiem u la wan ban shim bynta kum u koingsan bad kae ka sngi la ïa don ryngka truh naduh uy Dr. Abhishek Saini, Assistant Commissioner, u Bah S. Paslein, DSP Headquarter, ka Kong E. Kharshandy, District Social Welfare Officer, u Bah P.H. Shylla, Divisional Commandant ka tnad Home Guard Civil Defense bad kiwei kiwei ki ophisar.
Haba ai jingkren ha kane ka sngi kum u kongsan, u Bah Mayral Born Syiem u la ai ka jingïaroh ïa ka ophis ka ka tnad District Social Welfare Officer ka Ri Bhoi bad kiwei ki tnad sorkar kiba ïa la snoh kti ban pynlong ïa kane ka jingrakhe ban pyshah drok bad ka thong hi ka long ban ban ai jinghikai sha ki paidbah halor ka jingma bad ka jingktah jong u drok ba la pynjot ïa bun ki samla ha ka imlang ka sahlang.
Da kaba ai mynsiem ruh ba ïa khun pyrshah na ka jingkynrei jong u drok bad kiwei ki kam sniew, u Bah Mayral Born Syiem u la ong ba ngin lah ban pynduhjaid ïa kine ki jingdih ba sniew bad kiwei kiwei ki kam sniew, ka dei tang lada don kata ka jingïatrei lang na baroh ki laing bad kum u nongmihkhat paidbah u la kyntu naduh ki kmie ki kpa, ki samla, ki seng bhalang bad kiwei kiwei kiba don ka jingkitkhlieh ban ïa trei lang na ka bynta ban pynduhjaid ïa u drok bad kiwei kiwei ki kam sniew khang ban kiew ka shnong ka thaw bad ka imlang ka sahlang haba bun ki khun samla ki lait na ki jingsniew, u la bynrap.
La pynkut ruh ïa kane ka jingrakhe ïa ka sngi pyrshah drok da ka jingsam ïa ki khusnam kiba la jop ha ki jingïakop bapher bapher bad ruh la pynbut da ka jingbam smai ban shim lang kata ka jingkitkhlieh na ka bynta ban ïakhun pyrshah bad ban pynduhjaid ïa u drok uba long wei na u jingdih uba la pynsiew ym tang ïa kiba dih bad ka ktah ruh wat ïa ka ing ka sem bad ka imalang ka sahlang.