Ryngkat ka takma rnong wanrah ka Senibi Syngkli ïa ka burom ïa ka jylla bad ïa ka ri naka World Arm-wrestling Cup 2026
Nongpoh, Rymphang 09: Ka samla Senibi Syngkli, kawei na ki nongïakhun kti ba paw nam jong ka jylla Meghalaya, ka la wanrah ïa ka nam bad ka burom kaba khraw ïa ka jylla bad ïa ka Ri India hadien kala shah jied ruh ban ïalam kum ka kapten ïa ka kynhun nongïakhun kti jong ka ri ha ka World Arm-wrestling & Para Armwrestling Cup 2026, kaba la long ha Tashkent, Uzbekistan, naduh ka 31 tarik Kyllalyngkot haduh ka 7 tarik Rymphang 2026.
Ha katei ka lympung ïakhun kti, ka samla Senibi Syngkli ka la khur artylli ki takma rnong ha ka kyrdan 60 kg Senior Women, bad ka la ioh ruh ïa ka nam “Female Player of the Year”, ba la ithuh da ka Pro Panja League (PPL), ka lympung ïakhun kti kaba heh tam ha Ri India.
Hadien ba ka la wanphai sha ïing, ka Senibi Syngkli kala shah pdiang bad pynkup burom ha DTO, Umlyngkdait, da ka Women Organisation of Ri-Bhoi District ryngkat bad ka Hynñiewtrep National Youth Front (HNYF) Northern Region lyngba ka Sports Cell. Ha katei ka jingïalang, ki ar seng ki la ai ka jingïaroh, jingai mynsiem bad ki kitbok kitrwiang halor ka jingjop ba ka la khur na katei ka lympung kaba heh haka pyrthei.
Ha kane ka sngi la donlang ka Kong Mery June Myrsing, President ka Women Organisation of Ri-Bhoi District, ryngkat bad ki dkhot ka HNYF Northern Region, kynthup ïa u Samla Birbor Khongbeh, Sports Secretary, u Samla Ronald Tangsang, Assistant Discipline Secretary, u Bah Donroi Kshiar, Education Secretary, lem bad kiwei pat.
Haba kren ha kane ka sngi, ka Senibi Syngkli ka la pynpaw ïa ka jingsngewnguh ïa U Blei bad ïa baroh kiba la kyrshan ïa ka ha ka jingïaid lynti jong ka jingïakhun. Ka la ong ba ka jingïaid kam shym la long kaba suk, namar ba ka hap ban mad bun ki jingeh, hynrei ka jingïai neh skhem bad ka jingïakhun shitrhem ki la pynpoi ïa ka sha kane ka kyrdan.
Ka la ïathuh ba ha ka liang ka jingpynkhreh bad ka jingkilan met, ka hap ban leit shaduh Mizoram ban ïoh ka jinghikai kaba kham paka ryngkat kiwei pat ki nongïakhun ba don sap nalor ba ka mad jingeh ruh ha kaba ïadei bad ka pisa bad ka jinglut jingsep namar ka jingpyntip ban leit ïakhun sha katei ka lympung ka long kaba kyrkieh khlem da ioh kano kano ka jingïarap.
Wat hapdeng kine ki jingeh, ka Senibi ka la pynpaw ïa ka jingsngewnguh kaba khraw ïa u samla jong ka, uba la kyrshan ïa ka naduh ka jingsdang jong ka jingleit jong ka ban shim bynta ha katei ka lympung khamtam eh ka bai lut bai sep.