Mawkyrwat, ‘Naiwieng, 29: Ka Seng Samla Shnong Sohkhyllam (SSSS) ha ryngkat ka jingïatreilang bad ka NYK’s Nongstoiñ la ïoh ban rakhe ïa ka sngi ïa ka ‘Sngi ka Riti Synshar ka Ri’ ne ka ‘Constitution Day’ jong ka Ri India, ha kaba ïa kane ka prokram la pynlong ha Shnong Sohkhyllam, South West Khasi Hills District.
Kiba ïadonlang ha kane ka sngi ki long u Advocate ka Supreme Court, u bah Kynpham Kharlyngdoh uba dei u Resource Person, u bah Synshar Lyngdoh Marshilong uba dei u kongsan, u samla Rangbah ka dong ka thaiñ, u bah Kordorlin Kharlyngdoh, ki Nongkitkam jong ka Shnong Sohkhyllam, ki Rangbah kiba dei dkhot ka Durbar Shnong Sohkhyllam, bah Resparland Lyngdoh, bah Justwellin Marweiñ bad kiwei kiwei ki Rangbah, Secretary Seng Longkmie, kong Darity Lyngdoh, ki Dkhot ka Seng Samla Shnong, ki National Youth Volunteers jong ka Nehru Yuva Kendra Sangathan, Nongstoiñ bad ki longkmie longkpa bad ki samla lem bad ki hep barit.
La ïoh jingkren ba bud na u Kongsan, u bah Synshar Lyngdoh Marshilong uba dei u samla ba ju ïakit ïa bah ïa ki kam ha ka dong ka thaiñ bad u ba la ju ïarap ruh ïa kiba bun ha ka bha ka miat. Ha ka jingkren jong u u la ïaroh ïa ka Seng Samla Sohkhyllam kaba la shim ïa kane ka synjam kaba nyngkong ban rakhe ïa kum kane ka jait program kaba la ïa treilang bad ka NYK’s Nongstoiñ bad kaba la long ka prokram kaba jop.
Bud da ka jingkren na u Resource Person bad pynshai halor ka Constitution jong ka Ri halor katei ka phang bad pynsngewthuh ha baroh ki liang. Ka jingkren ruh na ki Rangbah ka Shnong ka thaw bad la pynshit pynshngaiñ ïa ka prokram da ka Cultural Program jong ki samla ka shnong bad ka Jingshad na u bah Iaipyndapbor Wanniang.
Ha kane ka program la ïoh ruh ban pynlong ïa ka jingïakop thoh esay bad jingïakop dro ki nongjop ki long ka Ibankerlin Lyngdoh bad bah Mightyson Syiemlieh.
La ïoh ban kren khublei na u bah Pynshngaiñ Lyngdoh uba dei u National Youth Volunteer jong Mawkyrwat Block NYK’s Nongstoiñ.
