Ryngkat ka nam ka burom wanphai iing ka kong Aiei Banity Lyngdoh, pdiang burom ka shnong Nongpoh

Nongpoh, Nohprah 02: Ka Dorbar Shnong Nongpoh lem bad ka seng Longkmie mynta ka sngi kila pdiang burom ïaka kong Aiei Banity Lyngdoh, ka longkmie kaba la ioh ban khur ïaka takma rnong haka lympung ïakop rahnar kaba la tip kum ka Khelo India Asmita East Zone Women Weightlifting League, 2025 kaba la long ha Kolkata naduh ka 26 tarik haduh ka 30 tarik u bnai Naiwieng.
Ka Aiei Banity Lyngdoh kala leit ban shim bynta ha katei ka lympung haka kyrdan 69 kg senior category bad hapdeng shibun ki thei lehkai na kylleng ki jaka kala lah ban poi shaka thong bad khur ïaka takma rnong na katei ka lympung kaba long ka jingsarong ïaka jylla bad ka them Ri-Bhoi baroh kawei.
Halor katei ka jingjop katei ka longkmie naka liang ka Dorbar Shnong Nongpoh, ka seng longkmie ryngkat ka Meghalaya Weightlifting Association lem bad ka Ri-Bhoi Weightlifting Association kila pdiang burom ïa katei ka longkmie lem bad 8 ngut kiwei pat.
Ha kane ka sngi la sakhi ruh daka jingdonlang ka kong Rona Khymdeit MDC ka Nongpoh, Bah Plielad Tiewsoh Assistant Rangbah Shnong, Donald Rymbai President ka Meghalaya Weightlifting Association, u Bah Anthony Kharnaior President ka Ri-Bhoi Weightlifting Association, u Samla Lumlang Shylla President ka seng Samla, ki dkhot ka seng longkmie Nongpoh lem bad kiwei kiwei.
Haba kren ha kane ka sngi naka liang ka kong Aiei kala pynpaw ka jingsngewkmen kaba khraw hadien ba kala ioh ban shim bynta ha katei ka lympung ïalehkai watla ki don shibun ki thei ïalehkai kiba paw haka ri, hynrei u Blei u la ai bor ïaka ban ïakhun ha kane ka lympung haduh ba kan da ioh khur takma.
Shuh shuh kala ong ruh shuwa ban leit shim bynta sha katei ka lympung ki ioh jinghikai tang kumba khyndiat bnai, hynrei ka jingtrei shitom bad ka jingai mynsiem jong kiba bun kala lah ban ïalehkai bha ryngkat ka jingkyrmen ruh ba kan dang lah ban lehkai bha shuh shuh ha kiwei pat ki lympung ba kham heh.
Kala ïathuh ruh ba kum ka longkmie kaba hap ban kitkhlieh ïaka iing ka sem shong ruh ha kawei ka dukan sha bad hap ban khie 4 baje mynstep man ka step ha Nongpoh, bad hap ruh ban ap dukan baroh shisngi hynrei da ka jingïarap lang ki bahaiing ka ioh ka por ban kilan bad ïalam ryngkat bad ki khun hadien ba ki wan tuition, namar kum ka longkmie ka kwah ba ki khun kin bud nuksa.
Naka liang ki nongïalam shnong, ki longkmie lem bad ka kynhun rah nar ka jylla bad Ri-Bhoi District kila pynpaw ka jingsngewkmen kaba khraw halor ka nam bad ka burom bala khur da katei ka longkmie kaba ruh ka jingsarong ïaka shnong Nongpoh bad ka District baroh kawei ryngkat ki jingkyrmen ba katei ka longkmie kan dang lah ban kilan bad lehkai bha naka bynta kiwei pat ki lympung kiba heh.