Ryngkat ka jingsynran ki paidbah la pynkit ïa ka met jong u MP ka Shillong sha Nongsder

Shillong, Rymphang 20 : Ha ryngkat ka jingsynran lang ki paidbah nongkyrshan bad ki Nongialam jongka Party VPP bad kiwei kiwei ïa ka met ba sah jong u MP ka Shillong u Dr Ricky AJ Syngkon lah pynkit noh na Pohkseh sha ka ïing sah jong u ha Nongsder, Ri-Bhoi District ha ka sngi Thohdieng.
La synran lang da u President ka VPP bah Ardent Miller Basaiawmoit, u CEM ka KHADC Winston Tony Lyngdoh, ki MLA bad MDC ka party lem bad ki paidbah, tad haduh ban da poi sha Nongsder.Shuwa ban rah ïa ka met, la pynlong ïa ka jingïaseng duwai ha Pohkseh.
U Myntri Rangbah ka Jylla Conrad K Sangma ula leit sngewlem sha ka ïingsah ha Pohkseh bad ai khublei khatduh ïa une u Nongïalam paidbah ba khlad noh.U Myntri Rangbah ula pynbna ïa ka shuti ha baroh ki District kiba hap hapoh ka Shillong Parliamentary Constituency ha ka sngi Saitjain ban ailad ïa ki paidbah ba kin leit ontep bad ai burom khatduh ïa u MP.
U Dr Syngkon, uwei na ki nongseng ka Voice of the People Party (VPP), ula khlad noh ha Dr H Gordon Robert Hospital ha ka miet sngi Palei, tang khyndiat por ba u kyllon ha ka jingïalehkai futsal ha Mawlai Mawiong. La pynbna ba ula khlad ha ka por 8:45 baje mynmiet.
ïa ka met ba sah jong une u nongïalam ba la khlad noh yn leit ontep don burom ha ka Sngi Saitjain.