Ryngkat ka jingkyrmen mih ka Meghalaya ban ïakhun ïa ka wat ba khadduh

Shillong, Nohprah 09: Ka kynhun ïalehkai phutbol jong ka Meghalaya ka la mih na Shillong hynne ka sngi Nyngkong ryngkat ka jingkyrmen bad ka jingangnud jong baroh ki riew ieid phutbol ka jylla bad kit halor ka tyrpeng na ka bynta ka wat ïakhun ba khadduh jong ka Senior Men’s National Football Championship na ka bynta ka Santosh Trophy 2024-25, ka ban sdang ha Hyderabad ha kaba kut jong kane ka taiew.
Ka Meghalaya ka la shah pynïakap ha ka Group B ryngkat bad ka Goa, Delhi, Kerala, Tamil Nadu bad ka Odisha da ka jingthmu ban long ka lahduh jong ka India. Ka Meghalaya kan ïakhun nyngkong pyrshah ïa ka Tamil Nadu ha ka 15 tarik Nohprah ha ka por 2 shiteng mynsngi ha Deccan Arena, Hyderabad.
Ki saw tylli ki kynhun kiba wan hakhmat eh na kine ki ar tylli ki Group kin rung sha ka Quarterfinal. Ka Meghalaya, kan ïakhun shitom ban poi sha ka thong, ban kham pynbha shuh ïa ka resol jong ka ha ka samoi 2022-23, ka samoi ba ka Jylla ka la wan ba ar shadien ka Karnataka, ka resol kaba bha tam jong ka jylla ha kane ka lympung.
Ka kynhun ïalehkai jong ka jylla ka la ïoh rung sha ka wat ïakhun ba khadduh (final round) ha kane ka kynti da kaba long ka lahduh jong ka Group E jong ki jingïalehkai Group stage ha kaba ka la jop ar sien bad ïakhaid shi sien ha Nalbari, Assam, ha u bnai ba la dep.
U Bah Hering Shangpliang un dang bteng ban long u coach jong katei ka kynhun, ïa kaba yn ïalam sa shisien pat da u Fullmoon Mukhim uba la shymphang bha kum u kapten.
Ha ka step sngi Nyngkong shuwa ba ka kynhun kan mih, la ïoh ban ai khublei khadduh ha ka jingïadonlang ki dkhot ba rangbah jong ka Meghalaya Football Association, ba la ïalam da u President – Bah Hamlet Dohling ryngkat bad u General Secretary – Bah Sunesh Syiem, u Vice-President – Bah Cliff Nongrum bad u Treasurer – Bah Prosper Warjri.
“Ka long ka burom ïa phi ban ïoh mihkhmat ïala ka jong ka jylla Meghalaya,” la ong u Dohling ïa ka kynhun. “Phi don ka jingkyrshan jong ka jylla baroh kawei ha lyndet jong phi bad ngi don ka jingshaniah ba pura ha phi. Phi la seisoh ïa ka wat ba nyngkong ha Assam bad mynta ngi ngeit skhem ba phin poi sha ka thong ha ka final round. Ngim kwah tang ba phin leh bha hynrei phin jop. Balei ngim lah ban jop? Phi la trei shitom bad lada phi pynneh ïa ka jinglong ryntih bad ka jingïatreilang ym don ka daw ba ngin ym lah ban rah ïa ka trophy .
Ha kawei ka liang, u Bah Sunesh Syiem u la ong, “Ngi la ïohi ba phi don ka mynsiem kaba itynnat bad phi la trei shitom. Phi donkam ban pynneh ïa kane bad kumjuh ruh ïa ka jinglong ryntih jong phi, bad na ka liang jong ka MFA, ngi don ka jingkyrmen kaba skhem ha phi.”
Na ka liang ki player, u Fullmoon, uba la long ruh u kapten jong ka kynhun ha ka por ba ka la shah rem ha ka Karnataka da 3-2 kol ha ka final jong ka samoi 2022-23, u la ai jingkren, da kaba ong ba ki player kin aiti lut ban ïohrah ïa ka burom lahduh.