Ryngkat ka jingïaid proseshon rakhe ka ophis DSWO ïa ka sngi pyrshah drok ha Nongstoiñ

Nongstoiñ, Jylliew, 24: Kum ka jingïasnohktilang bad ka pyrthei baroh kawei ha ka jingrakhe ïa ka sngi pyrshah drok, ka ophis jong ka District Social Welfare Officer West Khasi Hills mynta ka sngi thohdieng ka 24 tarik jylliew, ka la pynlong ïa ka jingïaid proseshon ryngkat ka awareness programe ha Nongstoiñ.
Ha kane ka sngi la sdang da ka jingïaid proseshon na I.B Upper New Nongstoiñ sha Ladweitang haduh ban da poi ha market complex ha khmat ïew Nongstoiñ. Ha katei ka jingïaid proseshon la ïashimbynta lang da ki dkhot ka KSU Nongstoiñ circle, ki longkmie bad ki khynnah skul bad kum ka dak jong ka jingpyrshah ki la rah ruh da ki placard bad ki banner kiba la thoh ïa ki kyntien pyrshah ïa ka jingkhaïi bad dih drok.
La pynlong ïa ka awareness programe ha ka hall jong ka market complex, ha kaba la pynïaid da u bah W.Shabong District Child Protection Officer West Khasi Hills, ha kaba ki nongkren ba kongsan ki long u bah H.K Thabah Additional Deputy Commissioner, u bah Herbert G.lyngdoh Superintendent of Police West Khasi Hills bad u bah Macmilan Byrsat MLA ka Nongstoiñ u ba long u kongsan.
U bah H.G.Lyngdoh Superintendent of Police West Khasi Hills, u la ong ba lada ki don ki nongdih drok kiba pyrshang ban pynshoi, ki khynnah kim dei ban ngeit hynrei ki dei ban kham pynleit jingmut ha kiwei pat ki kam kiba ai jingmyntoi ïa ka lawei jong ki. U la kyntu ruh ba ki khynnah bad ki samla ki dei ban long kiba smat ban leit sha ki jingïaseng sha ki ïingmane bad ban kham pynleit jingmut sha kaba bha.
U bah Macmilan Byrsat u ba long u kongsan bad shuwa ba un ai jingkren, u la pyllait ïa ka video kaba la shna halor ka phang jong ka jingsniew jong ka jingdih drok. Utei u nongmihkhmat haba ai jingkren, u la ong ba ki don shibun ki khynnah samla ha Nongstoiñ kiba la buh da ka thong ban pynngop lut ïa ki khun jong kiba kham ïoh kham kot ha u drok, namar ba kin kham ïoh pisa ban thied bad dih lang.