Ryngkat ka jaka ïalehkai khynnah, plie ka Byrshemlang SHG ïa ka ophis thymmai ha ka shnong Mawroh

Nongpoh, Rymphang 02: Ka Byrshemlang Self Help Group kaba dei kawei naki kynhun jong ki longkmie haka shnong Mawroh Nongpoh kala plie paidbah ïaka ophis treikam kaba pura ba kum ki longkmie hapoh katei ka kynhun kin ioh ban pyndep ïaki kam ki jam ïa kaba la tei lyngba ka skhim SRWP.
Katei ka ophis thymmai ka long ruh kum ka jaka buh ïaki tiar ki tar bad ha phyllaw pat la shnong ruh ki jaka lehkai khynnah, ba ki khynnah rit ha katei ka shnong kin ioh ban pynlut por ban lehkai ban lait naka jingkyrni haka mobile phone.
Ïa katei ka ophis treikam ba pura jong ka Byrshemlang SHG lem bad ka jaka lehkai khynnah la wan ban plie paidbah da u Bah Mayral Born Syiem MLA ka Nongpoh kum u kongsan haka jingdonlang u Bah Bah Opel Lyngdoh Rangbah Shnong ka Mawroh, u Chairman ka Byrshemlang SHG, Bah Anthony Kharnaïor, ryngkat bad ki longkmie longkpa bad paidbah nong shnong.
Haba kren ha kane ka sngi naka liang u Bah Mayral Born Syiem u la ai ka jingïaroh ïa katei ka kynhun kaba la trei shitom ban leh shibun ki kam ban kyntiew ïaki para longkmie, ban trei naka bynta ka imlang ka sahlang kumta ki donkam ruh ka ophiss treikam ba pura ba kin ioh ban ïa mir jingmut ban pyndep ïaki kam ki jam bad khamtam ban ioh buh ruh ki kot ki sla ba donkam.
U la ong ruh kumba u ju kren ha kiba bun ki jingïalang ba kiba donkam shisha ka jingïarap kin ioh hynrei ki hap ban pyni ïaka kam kaba ki trei hangta ka jingïarap kan sa wan.
Lyngba kane ka sngi naka liang ka kynhun jong ka Byrshemlang SHG kila ai ka jingkhublei ba kyrpang ïa u MLA u ba kloi ban pynmang skhim naka bynta jong ki ban pynioh da ka ophis treikam kaba pura naka bynta jong ki.