Shillong, Nailur 14 : Ryngkat bad ka Ryngkat ka ïing ka sem jong u General Secretary ba rim ka seng HNLC u bah Cherishterfield Thangkhiew,u MLA jongka Mawlai Constituency u bah Process T Sawkmie u la dawa hapoh ka ïing dorbar thawaiñ ka jylla ban aiti tohkit ïa ka jingshah siat iap jong utei u rangbah sha ka CBI khnang ban paw ki jingshisha baroh.
Haba ïashim bynta ha ka Short Duration Discussion ba la wanrah da u MLA jongka Umroi Constituency halor ka shongsuk shongsaiñ bad jingshong shngaiñ ha ka jylla, u bah Process u la ong “ Phi ïohi ïa ka jingïakhih kiba jur naduh ka Sur ka Bri U Hynniewtrep, ka Sur ki Nong Mawlai ba kynthup ïa ka KSU, FKJGP, HNYF, HYC ba ki dawa ban pynshitom bad weng kam ïa ki pulit kiba donkti ha ka jingsiat iap ïa u bah Cherish kumta nga ruh kum u MLA jongka Mawlai nga ïeng rygnkat bad ka ïing ka sem jong u bah Cherish ban dawa aiti tohkit CBI halor kane ka jingjia ban paw lut ki jingshisha”.
Shwa ïa kane u la ai ka jingïaroh ïa ki bor pulit kiba la trei shitom ban wanrah ïaka shongsuk shongsaiñ ha ka jylla bad ym lah ban len ba ka jingshongsuk ka la wanphai ha ka jylla dei da ka jingtrei shitom ki pulit.Mynmiet la ïoh ban thiah suk namar ka jingtrei shitom ki pulit.
Hynrei ha kaba ïadei pat bad ka jingleit kem ïa u bah Cherish na Mawlai Kynton Massar na ïing jongu ha ka 13 tarik Nailar 2021 ka long kaei kaei kaba sngewsih bad ym poi pyrkhat bad ka dei ka jingtlot jongka tnad syntiat ki pulit ba sa poi shaduh ka jingsiat iap ïa u bah Cherish. Ha ka jignshisha ki la dei ban leit bad kem im ïa u namar u don ha la ïing hapdeng ka jingshitom bad thiah bad ki khun. Ka jingkhynra bad jingïalam pulit kaba la shyrkhei ka dei ka jingthmu ban shu leit bad siat iap beit ïa u. Kane ka long kumba la ïuhroit ïa ka hok longbriew man briew Kane ka long kaei kaei kaba sngewsih bad ym lah ban pdiang. u la ong dei ban phah tohkit CBI namar kumba la lap da ka jingtohkit jong u Justrice T Vaiphei ba ka don ka jingpyndonkam bun palat ïa ki bor pulit ha ka jingleit khynra bad ka don ruh ka jingtlot ka tnad syntiat ban wad jingtip namar u bah Cherish u thiah ha la ïing tang bad ki khun ym kumba la kynnoh bad mutdur da ki pulit. Ka Commission ka la dei ban sei madan ïa ki kyrteng bad ka sorkar ka la dei ban pynshitom ïa kiba donkti. Kumta kumba la dawa da ka ïing ka sem ba wat la ki pdiang ïa ka kaiphod jongka jingtohkit u Justice T Vaiphei bad kumba la dawa da ka ki seng bhalang, ka Sur ki Nong Mawlai, ka Sur U Paidbah, ki paid jongka Mawlai kumta kum u MLA ka Mawlai u ruh u dawa na u Myntri Kam Pohïing bah Lakmen Rymbui, na u Myntri Rangbah u Conrad K Sangma bad na u Symbud Myntri Rangbah bah Prestone Tynsong ba dei ban aiti noh ïa ka jingtohkit sha ka CBI.
Wat la ka Commission ka la ai ia ka kaiphod bad pynpaw ïa kiba bun ki kyrteng, hynrei ka khlem ai jingmut ban leh kumno bad ba ka sorkar ruh kam pat leh ei ei haduh mynta kumta u kyntu ïa ka sorkar ban aiti beit ïa ka jingtohkit sha ka CBI.
Ha kawei pat ka liang u la ai ka jingïaroh ïaka sorkar MDA kaba la shim khia ban wanrah ïaka seng HNLC sha ka miej jingkren ïasuk bad u kyrmen ba ka sorkar kan ïai ai ka jingkyrshan na sha lyndet ïa ka kynhun ba ïadon bynta haka jingïakren khnang ba kane ka jingïakren kan long kaba seisoh bad ba ka jingshongsuk kan wan phai junom haka jylla. Namar lada don ka jingshongsuk ka don ka jingroi jingpar ha ka jylla.
