Ryngkat ka Congress, pynkhreh ka NPP ban shimti hi noh ïa ka bor synshar ha KHADC

Shillong, Jylliew 18 : Ka National People’s Party (NPP) ka la pynkhreh mynta ban shimti hi noh ïa ka bor synshar na kti jong ka United Democratic Party (UDP) ha Khasi Hills Autonomous District Council (KHADC) hapoh ka jingïalam jong u Bah Titos W Chyne kum u Chief Executive Member.
Ki tyllong khubor ki ïathuh ba katei ka jingkhih jong ka NPP kadei hadien ba ka la don ka jingtyrwa treilang na ka Congress ban treilang noh bad pynkut ïa ka samoi ba dang sah. Kumba long mynta, dei tang ka Congress kaba don ha ka Liang Pyrshah ha KHADC.
“Ïa mynta ka jingïakren ka dang ïaid shaid shaid halor kane ka bynta bad lehse lashai ka sngi (ba sdang dorbar) ngin sa lah ban shim ïa ka rai,” ong ka tyllong khubor.
La ïoh jingtip ruh ba ka jingwan jong ka Congress ban ïatrei lang kadei hadien ba ka la don ruh ka jingïapynbeit ban sam doh kyndang lang ïa ki MDC jong ka. Hynrei halor kane haba pyrshang ban ïa kren bad katto katne ki MDC jong katei ka party ym shym la ïoh lad satia ban pyntikna.
Ki khubor ba ïoh lum ki ïathuh ruh ba lada katei ka jingpynbeit ka ïaid beit, ïa ka shuki CEM yn aiti ha ka NPP ban shimti katba ïa ka shuki Depuy CEM pat yn ai ha ka Congress khlem pat ïa kren pat ïa kiwei pat ki Executive Member. La ïathuh ruh ba ka shuki Chairman hi ka lah ban neh kumjuh lada ym don kano kano ka jingpynkylla.
La sngewthuh ruh ba ka shuki CEM ka lah ban leit sha uwei na ki MDC uba dei ruh u MLA barim ka NPP bad kumjuh ruh ka shuki DyCEM kan long sha u MDC ba dei ruh u MLA barim.
Lah ban kdew hangne ba ka NPP ka don mynta haduh 12 ngut ki MDC katba ka Congress pat ka don hynriew ngut, kaba mut lada khein lang baroh ki la poi sha ka 18 ngut na ki 29 ngut ki MDC (lait noh uwei u MLA ba shu thung).
Ki MDC ka NPP ki kynthup ïa u Bah Pynïaid Sing Syiem, Bah Victor Ranee, Bah Rangkynsai Kharbuki, Kong Macdalyne Sawkmie Mawlong, Kong Grace Kharpuri, Bah Alvin Khyriem, Bah Fantin Joseph Lakadong, Bah Teibor Pathaw, Bah Lamphrang Blah, Bah Sherbor Mawlong, Bah Bajop Pyngrope bad Bah Gigur Myrthong.
Katba na ka Congress pat ki kynthup ïa u Bah PN Syiem, Bah RV Lyngdoh, Bah Charles Marngar, Bah Gabriel Sohlang, Bah Batskhem Ryntathiang bad Bah Carnes Sohshang.
Lah ruh ban kdew hangne ba dang ha ki katto katne taïew la phriang bha ki khubor ba ar ngut ki MDC ka Congress ki la thmu ban leit pynïasoh noh sha ka NPP hynrei haduh mynta mynne pat katei ka kam ka dang sahteng beit kumto.
Ki tyllong khubor ki ïathuh ruh ba katei ka kynhun kan ïa kynduh ha kane ka sngi Nyngkong kaba dei ka sngi sdang Dorbar ha shwa ba kin ïaid shakhmat ïa ka kam.