Shillong, Rymphang 25 : U Myntri Rangbah Duh, Narendra Modi ryngkat bad ka Myntri ka Koit ka Khiah ka jylla, Dr. Ampareen Lyngdoh ha ka sngi U Blei ki la plie paidbah ia ki kali ban test ia ki marbam ba la tip kum ki Mobile Food Testing Laboratory, (FSW) ha State Central Library, Shillong.
Ia kine ki kali u Myntri Rangbahduh u la plie lyngba ki kor ka juk stad mynta na ka jingialang kaba long ha Rajkot, Gujarat
Kine ar tylli ki lad jong ka Food Safety Standards Authority of India (FSSAI) ban test ia ki mar bam ki dei kiba tip kum ka Food Safety on Wheel (FSW).
Kane ka dei ruh ka sienjam ban pynthikna ia ka jingshngain ki mar bam ha baroh ki jaka.
Katkum ka kyrwoh la ong ba kine ki FSW kiba la pynbiang lut ki jingai jingshakri bad kiba don ki nongtrei kiba la tbit ha ka kam, kin kyntiew ia ki lad leh test bad kin ai jinghikai ruh shaphang ia ki rukom kiba kyntiew ia ka jingshngain ha ki mar bam.
Kin pynsaphriang jingtip ha ki paidbah da kaba poi sha ki jaka ba kyndong tam jong ka jylla.
Ka jingwanrah ia kine ki ar 2 tylli ki FSW ha Meghalaya ka wan ruh ha ryngkat ka projek kaba kot sha ka 0.95 klur. La don lang ruh ha kane ka sngi naduh u Commissioner, Food Safety, Meghalaya Dr Joram Beda bad ka Deputy Commissioner, East Khasi Hills District, R.M Kurbah, bad kiwei kiwei ki la iashim bynta ha kane ka prokram.
