Shillong, Risaw 02 : Kum shi bynta ban rakhe ïa ka Swachh Bharat Diwas, u Myntri Rangbahduh ka Ri u Narendra Modi u la aiti ïa ki katto katne ki projek kiba kongsan bha na ka bynta ka Ri ba kynthup ïa ka Faecal Sludge Treatment Plant kaba don ha Bomfyle Road ha Shillong.
Ïa kane ka projek la shna da ka Shillong Municipal Board hapoh ka projek AMRUT. Kane ka projek ka long ruh kum ka sienjam na ka bynta ban wanrah ka jingkylla kumno ban pynkhuid ïa ki um ktien um jaboh bad ki jakhlia ha ki lynti ïaid jong ka um da kaba pynkhuid da ki kor ka juk mynta
Kum ka dak ka jingkmen, ka Shillong Municipal Board ka la pynlong ïa ka prokram kaba lyngkot ha katei ka jaka ha kaba u Myntri Rangbahduh u la ai ïa ka jingkren bad pynbna ruh ïa ka jingplie ïa katei ka projek.
Ha kane ka sngi la donlang ruh ka Myntri ka tnad ka Koit ka Khiah, Dr. M Ampareen Lyngdoh.
“Kane ka projek la buh ban ai jingmyntoi kumba 1 lak tylli ki longïing bad ka lah ruh ban pynkhuid ïa ka um jakhlia kaba 350 kiloliter ha ka shisngi. La thung ruh 18 ngut ki nongtrei ka Shillong Municipal Board da ka National Insurance Company Ltd ryngkat ka Janata Personal Accident Policies kiba shongdor T.2 lak tyngka uwei pa uwei,” ong ka Myntri ha ka social media jongka.
Ha kajuh ka por ka la pynpaw ruh ïa ka jingkmen ba ka la ïoh ban don bynta lang ha kane ka jingplie ïa katei ka projek kaba dei ruh ka lyngkhuh sngikha jong u Mahatma Gandhi.
Lyngba kane ka projek, ka thong ka long ban wanrah ka jingshngaiñ ïa ki nongtrei ba ju trei ha katei ka kam namar ki la ïoh ban pyndonkam noh da ki kor ki bor ban pynkhuid ïa kitei ki jakhlia.
Ha kajuh ka por ka la don ruh ka jingpynkup burom ïa ka jingtrei shitom jong ki nongtrei ka Shillong Municipal Board.
