Shillong, Naiwieng 13 : Ka National People’s Party (NPP) ha ka sngi Palei ka la pdiang burom ïa u MLA bad MDC barim ka Nongkrem, Bah Lambor Malngiang ryngkat ki nongïalam bad kumjuh bad ki spah ngut ki nongkyrshan ha ka jingïalang kaba long ha ophis treikam ka party kaba Bivar Road, Shillong.
Ïa u Bah Lambor la pdiang burom da u National President ka party ba dei ruh u Myntri Rangbah ka Jylla, Conrad K Sangma ryngkat u State President Bah Prestone Tynsong, National Vice President, Bah Sniawbhalang Dhar, Working President Bah Hamlet Dohling ryngkat ka jingdonlang u President ka NPYF Bah Wailadmiki Shylla, President ka National People’s Women Front Kong Grace Kharpuri, Chairman ka NPP Farmers Front Bah HM Shangpliang, ki MLA, MDC nalor kiwei kiwei ki nongïalam jong ka party.
Na ka liang u Bah Lambor haba kren ha ka jingïalang u la ong ba u sngewshoh mynsiem haduh katta katta haba u ïohi ïa ka rukom pdiang burom kaba shongkun ïa u bad kumjuh ïa ki nongïalam bad ki nongkyrshan jong u sha ka sem NPP.
Shuh shuh u ong ruh ba u dap da ka jingkmen ba ki kyrtong kiba u ju ïa kynduh ban aireng pyrshah ha ki snem ba la dep hynrei mynta ki donlang khrui ha kajuh ka party kynthup naduh u Bah Egenstar Kurkalang bad ruh u Bah Hilarius Pohchen.
U ong ruh ba ka jingwan pynïasoh jong u sha ka NPP kan pyntikna ba ka party ha u snem 2028 kan ïoh kham bun ngut shuh shuh ki MLA na kaba ka don mynta. “Ngam shym rung sha kane ka party ban ong ba ynda la poi ka elekshon ban ïakhun ban rem. Em nga rung ban pyntikna ba ngin poi sha ka jingjop,” u la ong.
Nangta u la ong ruh ba lada nujor ïa ka roi ka pa kaba wan ha ka constituency ka la ïapher baklybak na kaei kaba ki paidbah ki ïoh pdiang ha ka por ba u dang don kum u MLA. U ong ruh ba ki paidbah ki sakhi shai kdar ïa katei ka jingkylla.“Mynta sa shisien ka ai mynsiem biang ïanga ba ngin smat ngin sting, ngin khih ngin ksar na ka bynta ka bit ka biang jong ki paidbah.”
Ha kane ka sngi la ïoh ruh ïa ka jingkren na u Bah Wailadmiki Shylla uba dei ruh ha kajuh ka por u Myntri Sorkar ka Jylla kumjuh u Bah Hamlet Dohling bad kiwei kiwei kiba la pynpaw ba katba kiwei ki party ki dang bein nang khoh katta ka jingwan rung ki riew rangbah na ki party bapher bapher ka nang jur sha ka NPP.
