Ryngkat bad ka song pisa ba 3 lak rah ka Massar FC ïa ka nam lahduh ha ka FSKFT ba la long ha Smit

Shillong, Kyllalyngkot 18: Ka Massar FC 8 Bros kala long ka lahduh hadien ba kala lah ban pynliem noh ïa ka Laitkor SC da kaba rah ruh ïa ka song pisa ba 3 lak tyngka ha ka final jong ka Fourth Shortimai Knockout Football Tournament, 2025 kaba la long ha Smit.
Ïa kane ka tournament la pynïaid da ka Smit Sport Club bad kane kadei ka sien kaba saw ba ka Smit Sport Club kala pynlong ïa kane ka tournament, ïa kane ka final la long ha ka sngi Saitjain ha madan football ha Smit.
Haba phai sha ka jingïalehkai, tang shu sdang la sakhi ba baroh ar tylli ki team kila ïalehkai bha bad kiba i ïa biang bor hynrei ha kane ka kylla step ka Massar FC kala kham ïoh bun ki kabu hynrei kam shym la lah ban pynkhih jar.
Katba ka jingïalehkai ka dang ïaid ha shwa ban kut noh ka kylla step, ka Massar FC kala ïoh ïa kabu bad khlem da pynleh noh ei u rang ïalehkai ka Massar FC saw minit shwa ban kut ka por u la ïoh ban pynkhih ïa ka jar da kaba tam ïa ka Laitkor SC da 1 la 0 ha ka kylla step.
Haba sdang ka kylla miet tang hadien katto katne minit ka Massar FC kala ïoh biang ban pynkhih jar da kaba tam ïa ka Laitkor da 2 la 0, hynrei wat lada la shah tam ruh ki rang ïalehkai jong ka Laitkor kim shym la duh mynsiem hynrei ki ïakhun doh ïap ban pynphai kylla.
Wat hadien ka jingïakhun doh ïap ban ïoh pynphai kylla ka Smit SC kala ïoh shibun bah ki kabu ksiar hynrei kam shym la lah satia ban ïoh pynkhih jar tad haduh ban da kut ka jingïalehkai kala shu kot noh da 2 la 0, ïa kaba ka Massar FC 8 Bros kala long ka lahduh ha kane ka tournament.
Ha shwa jong kane u MLA bad MDC barim jong ka Nongkrem u Bah Lambor Malniang haba kren u la ong, kum u wei na ki paralok jong ka shnong Smit ka long kum ka kabu ban ïoh ai mynsiem ?ïa kine ki team kiba la poi sha ka final jong kane ka tournament.
Kum kine ki tournament ka pynïatyll ïa ki paidbah bad ka plie ruh ïa ka lad ka lynti na ka bynta ki khun samla kiba don sap ba kin ïoh ban pyni ïa la ka jong ka sap ka phong bad kin dang lah ruh ban kiew shaphrang ha ka kam ïalehkai ka jong ki, ong u Bah Lambor.
Shuh shuh u Bah Lambor u la pynpaw ruh ba kum kine ki tournament ka pyllait ruh na ki jingsniew bapher bapher ïa ki khun samla.
Na ka liang u Kongsan u Bah Banteidor Lyngdoh uba dei u MLA jong ka Mawkynrew haba kren u la ai khublei ïa kaSmit Sport Club kaba la pynlong ïa kane ka tournament la saw sien kynthih mynta.
“Kum u riew ïeit football nga sngewkmen ba ka jingïalehkai kala nang kiew hapoh ka jylla, u la ong bad bynrap ruh “Ka jingpynlong ïa kum kane ka jingïalehkai kan dang kyntiew ïa ki khun samla kiba ïa shim bynta ha ka tournament,” u la ong.