Tura, Naitung 07 : Ha ka jinghiar thma kynsan ia ka kynhun ki snar nongtuh bike nongtuh kali ha ka jylla, ki pulit ka West Garo Hills ki la ioh ban kem haduh 17ngut ki briew ryngkat bad 45 tylli ki kali kiba shah tuh na kylleng ki jaka ha Meghalaya bad wat na Assam ruh.
Halor kane, na ka liang u Myntri Rangbah ka jylla, Conrad K Sangma u la ai khublei ruh ia ka tnad pulit da kaba ong, “Ki runar na kylleng ki jaka ki pyrshang ban leh ia ki kam bymman ban pynthut ia ka shongsuk shongsaiñ ha Meghalaya.”
Na ka liang u SP ka West Garo Hills, u VS Rathore u la iathuh ba la thaw ia ka Special Investigation Team ha ka taiew ba la dep hadien ka jingshah tuh jong bun ki kali bad kumta ha ka jingtohkit halor ka jingshah tuh ki kali ha kine ki san snem ba la dep, la ioh ban kem haduh 17 ngut na ki bad ruh ryngkat ban ioh kurup haduh 45 tylli ki kali ba kynthup ia ki 11 tylli na Rajabala, 12 tylli na Jengjal, 2 tylli na Tura, 13 tylli na Dadenggre bad 7 tylli na Bongaigaon na Assam.
Hadien kane, kumba 10 tylli ki jingjia shah tuh kali, 6 tylli ki dei na Assam bad saw tylli na Meghalaya.
Na ka liang u SP u la maham ruh ia ki nongshong shnong ba kim dei satia ban thied ia ki kali rim khlem da pynshisha lane wad bniah bha bad ong ruh ba ki khmih lynti ba ha ki por ban dang wan kin ioh ban kurup kham bun.
