New Delhi Ïaïong 22: Ka ‘Resonate: The EDM Challenge’, ka jingïakob ba pawnam hapoh ka ‘Create in India’ Challenge ha shuwa ka World Audio Visual & Entertainment Summit (WAVES) 2025, ka la wanrah lang ïa ki sap na kylleng ka pyrthei ha ka Electronic Dance Music (EDM) ban rakhe ïa ka jingsaiñdur thymmai, ka jingpynwandur, bad ka jingïatreilang ha ka jingpynmih jingrwai bad ka jingtem live.
Ka Tnad Information & Broadcasting (I&B) ha ka jingïatreilang bad ka Indian Music Industry (IMI) ka la pynbna ïa ki kyrteng jong 10 ngut ki nongïashim bynta ba la shah jied na ka bynta ka ‘Resonate: The EDM Challenge’ ha ka 12 tarik Ïaïong 2025.
U Mark Ryan Syiemlieh uba dang 22 snem ka rta na Lummawbah, Upper Shillong, Meghalaya u la poi ha ka Top 10 jong ka ‘Resonate: The EDM Challenge’. Ki 10 ngut kiba la poi sha ka phainal, kynthup ïa u Mark Ryan Syiemlieh, mynta kin pynkhreh ban pyni ïa ka sur jong ki ha ka rynsan jong ka WAVES ha Mumbai naduh ka 1-4 tarik Jymmang, 2025.
U samla Mark Ryan Syiemlieh u dei uba la pyndep ïa ka kyrdan pule Bachelor’s degree ha ka Political Science na St. Anthony’s College, Shillong bad mynta u sah ha Mumbai. Ka jingïaid lynti jong u sha ka put ka tem ka la sdang naduh dang rit, kaba la wan na ka jingieid kaba jylliew ïa ka kam DJ bad ka jingpynmih jingrwai, da ki sur kiba pynïasoh lang ïa ki jingsawa techno bad ki jingsawa ba pynkhih mynsiem jong ka trance bad house.
Haba ïasam ïa ka jingsngewkmen jong u na ka bynta ka WAVE summit ka ban wan, u la ong, “Nga kwah ban ai khublei ïa ki nongpynïaid jong World Audio Visual and Entertainment Summit, kaba la pynlong da ka Tnad Information and Broadcasting, kaba la jied ïa nga kum uwei na ki 10 ngut ki nongïashim bynta ba la poi sha ka phainal jong ka Resonate EDM challenge. Ban long napdeng ki 10 ngut kiba la poi sha ka phainal ka long shisha ka burom. Ka long ka khyllipmat jong ka jingsarong bad ka dak jong ka jingpyrshang kaba nga la ai ha ka jingïaid lynti jong nga kum u nongtem. Kane ka kabu bad ka jingïoh jingithuh kalong kaba kongsan ïa nga namar ka pynkhlaiñ shuh shuh ïa ka jingngeit jong nga ha ka put ka tem kaba nga thaw bad ka pynshlur ïa nga ban nang kiewshaphrang ha ka kam saiñdur”
U la bynrap shuh shuh, “Ka WAVES ka la long ka rynsan kaba khraw. Ka long kaba eh ban shem ïa ki jingïakob kiba kyrshan shisha bad kyntiew ïa ki sap kiba dang mih, bad nga sngewnguh ïa ka jingpaw bad jingshemphang kaba ka la ai. Nga sngewnguh ïa kane ka kabu bad nga khmih lynti ïa kaei ka ban sa wan.”
Hadien ka jingjied kaba bniah bad da ki spah tylli ki jingpynrung kyrteng, la jied ïa kine ki shiphew ngut ki nongtem harum ban ïakhun live ha ka phainal ha ka rynsan jong ka WAVES ka ban long ha Mumbai naduh ka 1-4 tarik Jymmang, 2025: SrikanthVemula, Mumbai, Maharashtra, Mayank Harish Vidhani, Mumbai, Maharashtra, Kshitij Nagesh Khodwe, Pune, Maharashtra, Aaditya Dilbaghi, Mumbai, Maharashtra, Aditya Upadhyaya, Kumarikata, Assam, DevanshRastogi, New Delhi, Sumit Biltu Chakraborty, Mumbai, Maharashtra, Mark Ryan Syiemlieh, Mumbai, Maharashtra, Dibyajit Ray, Bongaigaon, Assam, NobajyotyBoruah, Mumbai, Maharashtra.
Kine ki 10 ngut ki nongtem ki pyni ïa ka bynta ba jylliew jong ka jingrwai elektronik jong ka India, da ki sur ba kyrpang naduh ki jingrwai shad ba jylliew haduh ki jingrwai shad ba shongshit bha. Ka jingïakob ka thmu ban wad bad kyntiew ïa ki sap kiba dang mih na ri India bad kumjuh ruh kylleng ka pyrthei ha ka jingpynmih jingrwai bad ka kam DJ. Ka jingjop jong kane ka Challenge ka pynkhlaiñ ruh ïa ki kyrdan jong ka India kum ka jaka pdeng jong ka pyrthei na ka bynta ka jingpynïasoh ïa ki jait jingrwai bapher bapher, ka jingtem electronic, bad ka jingtem DJ. Kine ki nongïashim bynta ba la shah jied sha ka phainal mynta kin pynkhreh na ka bynta ka jingïakhun ha ka phainal, ha kaba kin pyni ïa ka sap jong ki ha rynsan jong ka WAVES.
Ka kynhun jong ki nongbishar na ka bynta ka wat ba nyngkong:
Ïa ka Wat ba nyngkong la bishar da ki riewshemphang ha ka put ka tem na ka Lost Stories Academy, ka jaka ai jinghikai bad jingpynmih jingtem DJ ba pawnam ha India. Ki nongbishar ki kynthup ïa u Amey Jichkar bad u Anshuman Prajapati. U Amey u la don palat shiphew snem ka jingshemphang ha ka recording bad mixing bad u dei u audio engineer bad music producer uba la tbit bha. U la trei slem bha ha Bollywood, ki jingrwai ha ki kam ai jingpynbna, bad ki jingpynbna ba heh jong ki brand. Ki projek ba pawnam jong u ki kynthup ïa ka Veere Di Wedding, Laila Majnu, October, bad ki kam pynïaid ïew na ka bynta ka CRED, Flipkart, bad Upstox. U Anshuman u la don palat 10 snem ka jingshemphang ha ka beatboxing bad u la pynlut ïa ki lai snem ba khatduh kum u nongpynmih jingrwai. U Anshuman u tbit bha ha ka jingrwai Lofi bad Hip-Hop bad la tip ïa u na ka bynta ki jingtem experimental jong u bad ki jingsngewthuh jong u ïa ka A&R.
Shaphang ka WAVES
Ka World Audio Visual & Entertainment Summit (WAVES) kaba nyngkong, kaba dei ka jingïalang kaba kongsan bha na ka bynta ka kam Media & Entertainment (M&E), yn pynlong da ka Sorkar India ha Mumbai, Maharashtra, naduh ka 1 haduh ka 4 tarik Jymmang, 2025
Lada phi dei u nongtrei ha ka kam, u nongbei tyngka, u nongthaw, ne nongsaiñdur thymmai, ka Summit ka ai ka rynsan kaba pawnam ha ka pyrthei ban pynïasoh, ïatreilang, saindur bad noh synñiang sha ka kam M&E.
Ka WAVES ka la buh ban kyntiew ïa ka bor saiñdur jong ka India, ban pynkhraw ïa ka kyrdan jong ka kum ka jaka pdeng ban thaw ïa ki prokram, ka jingdon jingem ha ka liang ka jingstad, bad ka jingsaiñdur thymmai ïa ka teknoloji. Ki karkhana bad ki bynta ba la pynleit jingmut ki kynthup ïa ka jingpynbna khubor, Print Media, Television, Radio, Films, Animation, Visual Effects, Gaming, Comics, Sound and Music, Advertising, Digital Media, Social Media Platforms, Generative AI, Augmented Reality (AR), Virtual Reality (VR), bad Extended Reality (XR).
