Jowai, Risaw 23: Ka Ummulong SC ka la kylla long ka kynhun kaba ar ban bteng ïa ka jingïakhun sha ka semi final ha ka lympung phutbol bala tip kum ka ‘Hajan Shylla Memorial Trophy 1st Division’ bala pynïaid daka Thadlaskeiñ Sports Association (TSA) West Jaiñtia Hills hadien ba ka la khur ïa ka jingjop ha ka Quarter final kaba la long hynne ka sngi Palei, 23 tarik u Risaw, ha madan Wahiajer Multi-Sports Complex.
Kane ka jingïakhun Quarter Final kaba ar la sakhi ïa ka Ummulong SC kaba la jop da ka said da 2-1 kol ïaka Jalapang SC. Haba bishar ïa ka jingïalehkai, ka kylla step ka la ïakhaid khlem don ba lah ban pynkhihjar, hynrei ka Ummulong SC ka la wanphai da kaba tyngeh ha ka kylla miet ban thep ar tylli ki kol lyngba u Samroi Phawa haka minit ba 46 bad u Lamphrang Dkhar haka minit ba 56.
Na ka liang jong ka Jalapang SC ka la ïoh ban pynphai shi kol lyngba u Marvel Kyndait haka minit ba 70 hynrei kam shym la lah shuh ba kan wanphai kaba la pynlong ïa ka ban mad ïa ka namrem.
Da kane ka jingjop, ka Ummulong SC ka la kylla long ka kynhun kaba ar hadien ka Nongkhroh Mawsiang SC, kaba la pynthikna ïa ka jaka ha ka semi final jong ka Hajan Shylla Memorial Trophy 1st Division ka TSA.
Ka jingïakhun Quarter Final kaba lai ka bteng ha kane ka sngi Thohdieng, 24 tarik u Risaw, haka haka por 2 baje nohphai sngi ha kaba ka Khliehtyrshi kan aireng pyrshah ïaka Tyrshang SC.
