Jowai, Risaw 24: Ka Khliehtyrshi SC ka la pynthikna ïa ka jaka ha ka semi final jong ka lympung phutbol bala tip kum ka ‘Hajan Shylla Memorial Trophy First Division 2025’ bala pynïaid daka Thadlaskeiñ Sports Association (TSA), West Jaiñtia Hills, hadien ba ka la jop ïa ka jingïakhun Quarter final kaba la long hynne ka sngi Thohdieng ha madan Wahiajer Multi-Sports Complex.
Haba phai sha ka jingïakhun ka Khliehtyrshi SC kala hap ban wanphai nadien ban jop da 2-1 kol hadien ba ka Tyrshang SC ka la pynkhihjar nyngkong.
Hadien shiteng kynta ba la ïaid ka kylla step ka Tyrshang ka la pynkhihjar nyngkong lyngba u Baranabas Pyngrope (30’) ban lamkhmat ïa ka jingïalehkai hynrei ka Khliehtyrshi ka la ïoh ban jubab tang hadien lai minit da kaba pynïakhaid lyngba u Cheimi Dkhar (33’) kaba la pynkut ïa ka kylla step ha ka jingïakhaid.
Ka kylla miet ka la long kaba ïakhaid bha bad ka la shimpor tad haduh ki minit pynjlan ba khatduh ïa ka Khliehtyrshi ba kan thep ïa ka kol kaba kongsan tam lyngba u Bravemi Rymbai (80+5) ban pynskhem ïa ka jingjop.
Kane kadei ka Quarter final kaba lai jong ka TSA First Division 2025, bad ki kynhun kiba la ïohrung sha ka semi final ki long ka Ummulong SC, ka Nongkhroh Mawsiang SC, bud sa ka Khliehtyrshi SC.
Kaba dang sah mynta ka long ka Quarter Final kaba saw bad kaba khatduh hapdeng ka Larnai SC pyrshah ïa ka Dongmihsngi SC. Ka jingïakhun jong kine ki arliang kan long ha kane ka sngi Saitjaiñ ha ka por 2 baje nohphai sngi.
