Rung semi final sa ka Christ Chruch (Day), Mawlai Presbyterian & Umrynjah Presbyterian

Shillong, Nailur 05: Ka jingïalehkai jong ka lympung ïalehkai phutbol kaba kaba la tip kum ka IXth Inter School Knock-Out Football Tournament 2023 kaba la pynlong ha Madan Heh Mini Stadium Mawlai Phudmuri bad ba la pynïaid da ka Federation of Khasi Jaintia and Garo People, Mawlai Circle, kaba la long hynne ka Sngi Balang.
Nalor jong ka Christ Church (Skul Step) kaba la ïoh ban jam sha ka semi final, ki lai kynhun kiba kynthup ïa ka Christ Chruch (Day), ka Mawlai Presbyterian bad ka Umrynjah Presbyterian, ki la ïoh ban buh jaka ïalade ban ïoh ïakhun ha ka semi final hadien ba ki la khur ïa ka namjop ha ka jingïakhun ka jong ki kaba la long hynne ka Sngi Balang, ha Mini Stadium, Mawlai Phudmuri.
Haba phai sha ka jingïakhun quarter final kaba nyngkong kaba la sdang naduh ka por 1 baje mynsngi, hapdeng Nongkwar Presbyterian pyrshah ïa ka Christ Chruch (day). Ka jingïalehkai ka la jam sha kaba kut ha kaba ka Christ Chruch (day) ka lah jop salit da shi kol, bad kane ka shi kol la thep lyngba u Kedrial kaba la biang pura ïa ka kynhun ban jam sha ka semi final.
Katba ha ka jingïakhun kaba ar kaba la long hapdeng ka Mawlai Presbyterian pyrshah May Queen, ka Mawlai Presbyterian ka la pynjemkhnap da kaba thep haduh 3-0 kol ïa ka May Queen ban pynthikna ïalade ban ïakhun ha ka semi final.
ïa ka kol kaba nyngkong la thep da u Wilbert Kharbuki bud sa ka kol kaba ar na u Mebankyrshan Warbah bad khadduh na u Manbha Rani.
Haba phai pat sha ka jingïakhun quarter final kaba khadduh, hapdeng ka Umrynjah Presbyterian pyrshah ïa ka Nongkwar Sec School, haduh kaba kut jong ka por ym shym la don mano mano ba lah ban pynkhihjar kaba la ïalam ïa kine ki ar kynhun sha ka tie-breaker.
Ha ka jingïashut ïa ka tie breaker, ka Umrynjah ka la jop da 4-3 ban khur ïa ka namjop bad ruh ban kyntiew ïalade ha ka thup ki saw kynhun kiba ïakhun ha ka semi final jong kane ka tournament.